Маңғыстау ауылында спорт алаңы жаңартылды

Маңғыстау ауылындағы төрт спорт алаңына жөндеу жұмыстары жүргізілді, деп хабарлайды mangystaumedia.kz сайты аудан әкімдігінің баспасөз қызметіне сілтеме жасап.

Аудан әкімдігінің айтуынша, 22 орамдағы алаңға жасанды газон төселіп, қақпалар қойылған. Сондай-ақ, спорт алаңының қираған, жарамсыз қоршаулары қайта қалпына келтіріліп, сырланды. Спорт алаңының жарықшамдары ЛЭД лампаларға ауыстырылды.

- Аталған жұмыстар 1 айдың ішінде аяқталды. Алаңды жөндеуді тұрғындар көптен бері сұраған еді. Биыл бюджеттен қаражат бөлініп, абаттандыру есебінен іске асырылды. Алдағы уақытта тағы да жалғасын табады,-деді ауыл әкімінің орынбасары Нұрбол Орынбасаров.

Осы уақытқа дейін орташа жөндеу туралы аудан, ауыл әкімдеріне шағымданған тұрғындар дән риза.

- Бәрі сынып жатыр еді, балалар, немерелеріміз ойнай алмай жүрген. Жасыл газон төсегеннен кейін, өзіміз көрпеше төсегендейміз. Кешқұрым көршілермен әңгіме-дүкен құруға шығамыз. Қалпына келтіргеніне көп рахмет! Алғысымды айтамын,- деді ауыл тұрғыны Тойташ Меңдібаева.

Сондай-ақ, Маңғыстау ауылына қарасты Ақеспе тұрғын-массивінде ойын алаңы пайдалануға берілді. Сәттіғұл көшесінде орналасқан ойын алаңының құрылысы екі ай бұрын басталған еді. Көлемі 200 шаршы метрді құрайтын алаңда әткеншек, сырғанақ, карусель сияқты жабдықтар орналасқан.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.