«Жас батыр» спорт мектебі болашақ чемпиондарды шақырады

Арманы асқақ талай жастың бұғанасын бекітіп, қанатын қатайтып, дүбірлі додаларда топ жарып, жеңімпаз атануына қолдау көрсетіп жүрген облыстық «Жас батыр» мамандандырылған балалар мен жасөспірімдер спорт мектебі болашақ «чемпиондарды» асыға күтеді. Мұнда 8-11 жас аралығындағы спортқа икемі бар мектеп оқушылары бос уақытында спорттың дзюдо, самбо күресімен айналысып, білікті бапкерлерден тегін дәріс ала алады.

Аталмыш мектептен осы уақытқа дейін талай халықаралық жарыстарда топ жарған, ел намысын Азия, Әлем чемпионаттарныда абыроймен қорғаған, Маңғыстаудың мақтаныштары Әмірбек Жеңісов, Сұңғат Жұбатхан, Бауыржан Нарбаев, Бауыржан Сағынғалиұлы, Рамазан Мамаевтар тәлім алды. Сіз де солардың қатарынан көрінгіңіз келсе, уақыт өткізбей 24 шағынаудандағы облыстық «Жас батыр» мамандандырылған балалар мен жасөспірімдер спорт мектебіне келіңіз.

-8-11 жас аралығындағы ұлдар мен қыздар біздің спорт мектебіне келіп, сабақтан тыс уақытта спорттың дзюдо, самбо күресімен айналыса алады. Оқушылардың сабақтарына кедергі келтірмеу үшін спорт мектебіндегі секциялардың арнайы кестесін жасақтайтын боламыз. Ұлдарды білікті бапкерлер Жомарт Қобыланов, Асхат Хапанов, Ерлан Серіков дайындайды. Облыста қыздар арасында дзюдо мен самбо күресін дамыту үшін КСРО-ның спорт шебері, белгілі бапкер Мәншүк Баданованы арнайы шақырдық. Сонымен қатар ҚР спорт шебері Балнұр Аппазова да қыздарды жарыстарға дайындап, қыздар арасында чемпиондарды шығаруға атсалысатын болады. Оқушылардың спорт секцияларына қатысуы тегін,-дейді облыстық «Жас батыр» мамандандырылған балалар мен жасөспірімдер спорт мектебінің директоры Манарбек Бисекенов.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.