Жекпе-жек: Маңғыстаулық спортшылар ел чемпионатынан 13 медаль алды

Ақтау қаласында әмбебап жекпе-жектен Қазақстан Республикасының чемпионаты өтті. Нәтижесінде мңғыстаулық спортшылар командалық есепте 1-орын алды,-деп хабарлайды mangystaumedia.kz сайты Маңғыстау облысының Қоғамдық коммуникация орталығына сілтеме жасап.

Жарысқа 1 шағынауданда орналасқан «Каспий» спорт кешенінде өтті. Өңірде алғаш рет ұйымдастырылған додаға 150 спортшы қатысты.

- Бұл спорт түрімен 10 жылдан бері айналысып келемін. Жарыс жоғары деңгейде өтті. Жартылай финалда кездескен Шымкент қаласының спортшысы және финалда кездескен Маңғыстау облысының спортшысы да өте мықты дайындалғаны көрініп тұр, - деді Нұр-сұлтан қаласынан келген спортшы Жеңіс Ердаулет.

Жарыс қорытындысы бойынша командалық есепте Маңғыстау облысының командасы 1-орын, Қызылорда облысының командасы 2-орын, Ақтөбе облысынан келген спортшылар 3-орынға тұрақтады. Жалпы Маңғыстау облысының спортшылары 3 алтын, 5 күміс, 5 қола жүлдені еншіледі.

Ел чемпионаты мамыр айында Ташкент қаласында өтетін Әлем чемпионатына іріктеу мақсатында өткізілді. Маңғыстау облысынан Әлем чемпионатына 4 спортшымыз аттанады. Олар Баладдин Гулиев, Айболат Мұратұлы, Арман Салтанатов, Мансұр Мимбулатов.

- Жарысқа жоғары деңгейде дайындалдық, бүгін чемпион атандым. Жаттықтырушыларыма алғыс айтамын. Спорт шеберіне үміткер болып жатырмын. Енді мамыр айында өтетін Әлем чемпионатына қызу дайындық басталады.
Бар күш-жігерімізді саламыз, - деді
55 келі салмақ дәрежесінде чемпион атанған маңғыстаулық Арман Салтанатов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.