Өнер керуенінің концерті

Елордамыздың 20 жылдығына орай өңірімізде өткен Астананың мәдени-күндері мәресіне жетті. Өлкеде 3 күнге созылған мәдени күндерде концерттерді, театрландырылған қойылымдарды, көрмені тамашалаған маңғыстаулықтар кәусар жырмен сусындап, жан дүниесін рухани байытты. Маңғыстауды ән мен күйге, жыр мен мереке-думанға бөлеген өнер керуенінің тартуы Абай атындағы мәдени-демалыс кешенінде «Елордадан елге сәлем!» концертімен түйінделді. Елбасы Н.Назарбаевтың «Болашаққа бағдар: рухани жаңғыру» бағдарламалық мақаласын жүзеге асыру аясында өткен мәдени кешке әр саланың мамандары, ардагерлері және қа­ла тұрғындары қатысты. Астана қаласы әкімдігінің мемлекеттік­ академиялық филармониясы ұйым­дастырған кештің шымылдығы ҚР Еңбек сіңірген қайраткері Айтқали Жайымовтың «Шаттық елі» күйімен түрілді. Күйді «Қазақ» оркестрі орындап, көрерменнің қошеметіне бөленді. Мерекелік концертте Абайдың қара сөздерінен әдеби музыкалық кештен үзінді­лер қойылып, шебер кестеленген «Сегізаяқ» өлеңі айтылды. «Жыр алыбы – Жамбыл» жырын Кенен Әзірбаев атындағы республикалық байқаудың лауреаты Жазгүл Даңылбаева нақышына келтіре орындап, көпшіліктің ықыласына бөленді. ТАҒЫ ОҚЫҢЫЗ: Ақтаудағы «Оңалту және әлеуметтендіру орталығы» жаңа ғимаратқа мұқтаж Кеште «Қозы Көрпеш­-Баян сұлу» спектаклінен «Дайдидау» әнінің желісімен үзінді сахналанды. Атал­ған филармонияның әншісі Айнұр Қонысбаева Нұртуған жыраудың «Қанеки, тілім, сөйлеші» термесін мақамымен айтып, көрерменннің көңілін бір серпілтіп тастады. «Қа­зақ» оркестрі Н.Тілендиевтің «Ата толғауы», Қорқыттың «Елім­ай, халқым­ай» күйлерін  тамылжытатөкті. Кеште композитор Арман Жайымның  «Алпамыс» балетінен үзінді ретінде «Тайшық ханның Қуаныш» биі туындысы ұсынылды. «Қазақ оркестрінің»  өнерпаз­  дарының «Шалқыма» халық биі ансамблінің, эстрадалық,  халық және классикалық вокал солис­терінің өнері көрермендерді шат­шадыман күйге бөледі. Бабалардан қалған бағзы әуендерді әуелетіп, ұлттық өнерді биік белеске көтерген өнерпаздар халыққа рухани қуат сыйлап, шөлін басты.

Фарида МҰҢАЛҚЫЗЫ Суреттерді түсірген Талант ҚҰСАЙЫН

[gallery td_select_gallery_slide="slide" ids="54823,54819,54822,54818,54820,54821"]