Астана күндері күнделігінен

Жыл сайын елімізде үлкен мерекелік шаралармен аталып өтетін Астана күні биыл ерекше маусымын өткізуге дайындық үстінде. Астана қаласының 20 жылдық – жігіт жасын мәде­ниет және өнер қайраткерлері көрермен көңілін асқақтататын сазды­думан кештерімен, мерекелік жобаларымен қарсы алуда. Мамыр айының аяғында елордалық өнерпаздар Ақтау қаласы тұрғындарына керемет өнер туындыларын тарту арқылы көтеріңкі көңіл күй сыйлап, өздерінің үздік театрландырылған қойылымдарын қояды, отандық қыл қалам шеберлерінің озық еңбектерін ұсынады.

Н.Жантөрин атындағы Маңғыстау облыстық музыкалық драма театрында «Ақ тілекпен, Астана!» тақы­рыбымен жұмыс істейтін көрмеге 50 қа­зақстандық суретшінің 100­-ге тарта еңбегі шығарылды.

«Жастар» театрының артистері ақтау­лықтарды үздік қойылымдарды тама­шалауға шақырады. Көрермендер назарына қоюшы-­режиссер – Қазақстанның еңбек сіңірген қайраткері Нұрқанат Жақыпбай­дың «Қыз Жібек» мюзиклі ұсынылады. Қойылымға Жағалбайлы руынан шыққан Төлеген мен Шектінің қызы Жібек туралы әрі лирикалық, әрі қайғылы хикая арқау болған. Бақталастық, қызғаныш, Жібектің жүрегінен орын алу  үшін  күрес,  жаз­мыш – ең танымал қазақ фольклорының классикалық сюжеті аталмыш мюзиклдің негізіне алынған. Қойылымды қоюшылар Евгений Брусиловскийдің музыкасын пай­даланады. Оған жаңаша рең береді.

«Жанарымдағы жалғыз әуен» («Зримая песня») қойылымы сахналанады. Музыка тілі – баурап аларлық, шынайы әрі жұмбақ. Соңғы гастрольдік кеште Ақтау қаласының тұрғындары «Асауға тұсау» («Укрощение строптивой») комедиясын тамашалайды.

Елордалық театрдың қойылымы Уильям Шекспирдің мәңгі өлмес шығармасына не­гізделген. Апалы­сіңлі – Бьянка мен Ката­рина. Біріншісі – нәзік қарапайым болса, екіншісі – қыңыр. Екеуі де – кісі қызығарлық қалыңдықтар. Алайда Бьянканың жігіті көп болса, Катаринаға олар жолай алмайды. Тек Петручио ғана... ҚР еңбек сіңірген қайрат­кері Нұрқанат Жақыпбай, ҚР еңбек сіңірген қайраткері Бекболат Құрманғожаев, Тұң­ғыш Президент қоры – Елбасы сыйлығының лауреаты Дәурен Серғазин күлкіге толы комедияны көпшілікке ұсынады.

ТАҒЫ ОҚЫҢЫЗ: Маңғыстауда мәдениет қызметкерлері күні аталып өтті

Ақтауда қойылатын мәдени бағдарлама аясында концерттер де өтеді. Соның біре­гейі – Абай атындағы мәдени­демалыс ке­шенінде ақтаулықтар көзайымына айналған «ASTANA BALLET GALA» премьерасы. Хореограф, Қазақстанның Еңбек сіңірген қайраткері  Айгүл  Тәтидің жетекшілігімен «Тұран»  этно­-фольклорлы тобының балет әртістері қойған музыкалық композициясы «Арулар», «Ақ қыз», «Қыз қайың», «Әсем қоңыр», хореограф Анна Цойдың жетек­шілігімен «Қуанамын», хореограф Дәурен Әбдіровтің жетекшілігімен ұсынылған «Балбырауын» өнер туындылары көрермен көзін ұлттық нақыштағы ашық костюм­дермен, әсем табиғат көріністерімен, ең бас­тысы шебер қимыл­-қозғалысқа құрылған бимен жаулап алды. Ұлттық сырлы саз­ бен үйлесім тапқан әсем балет өнерімен сусындатқан астаналық өнер иелерінің шеберлігіне тәнті болған көрермен ыстық ықыласпен құшырлана қол соқты.

Хореограф Мукарам Авахридің жетек­шілігімен көрермен назарына ұсынылған «Chemirani» этно-­фольклорлы тобының музыкалық композициясы «Скиф фрес­калары», хореограф Рикардо Амаранте­нің «Diversity» балетін орындаған Риза Қанатқызы, Фархад Буриев, Балжан Нұрпейісова, Марат Әбдірахманов, Айда­на Қалмұқанбет, Зино Меркс, Паула Роза Санта, Бауыржан Мекембаев т.б. әртістер классикалық өнердің шынайы үлгісін көрсете алды.

Абай атындағы мәдени-демалыс кешенінде «Астанадан ақ тілек» гала-концерті арқылы ақтаулықтар Астана қаласы әкімдігінің мемлекеттік академиялық филармониясы ұжымының шығармашылығымен танысады. Атап айтқанда, ҚР еңбек сіңірген қайраткері Айтқали Жайымов жетекшілік ететін Қазақ оркестрі, эстрадалық би, «Шалқыма» халық биі ансамбльдері, эстрадалық, классикалық және халық вокалы солистері өз өнерлерін ортаға салады. Сонымен қатар елге танымал әншілер Клара Төленбаева, «Арт-Домбыра» триосы, Ринат Малцагов, Күләйым Қайырбаева, Айгүл Қосанова, Алмас Кішкенбаев, Тамара Асар т.б. қазақ эстрадасының жұлдыздары өнер көрсетті. Теңіз жағалауындағы Open Air концертте сүйікті әнші-бишілер өнерін тамашалады. Ақтаудағы Астана мәдени күндері Абай атындағы мәдени-демалыс кешенінде «Елордадан елге сәлем!» гала-концертімен аяқталады. Ақтау тұрғындары Қазақ оркестрі музыканттарының, «Шалқыма» халық биі ансамблінің, эстрадалық, халық және классикалық вокал солистерінің өнерін тамашалайтын болады.

Үміт ЖӘЛЕКЕ Суреттерді түсірген Серік МАЙЕМЕРОВ

[gallery td_select_gallery_slide="slide" ids="54705,54701,54703,54704,54702"]