Ақтауда республикалық ақындар айтысы өтіп жатыр

Ақтауда «Тәу етерім – Тәуелсіздік» атты республикалық ақындар айтысы өтіп жатыр, - деп хабарлайды mangystaumedia.kz.

Айтыс «Nur Otan» партиясының қолдауымен «Ұлттық мұра» бағдарламасы аясында өтіп жатыр. Жиынның ашылу салтанатында облыс әкімінің орынбасары Гүлмира Қалмұратова мен «Нұр Отан» партиясының МОФ төрағасының бірінші орынбасары Елубай Әбілов сөз сөйлеп, ақындарға сәттілік тіледі.

«Бұл айтыстың мақсаты біреуді кекетіп, мұқату емес. Кестелі жырдан сурет салып, осы елдің тарихын еске түсіру, халықтың рухын көтеру, еңсесін тіктеу, індет ірге алып тұрған заманда бірлік пен бауыршылдыққа шақыру», - деді айтыстың атасы атанған Жүрсін Ерман.

Кеше еліміздің әр түкпірінен келген 18 ақыннан 9 жұп айтысты. Алғаш болып жырдан моншақ тізген жерлесіміз Нұрлан Мұсаев ақтөбелік Марат Ахметовпен айтысты. Осы додаға Маңғыстау облысынан 7 бірдей сөз шебері қатысып жатыр. Қазылар алқасының шешімі бойынша, айтыскерлер баллмен бағаланбады. Өнер көрсеткен 18 ақынның ішінен 8-і ақтық бәйгеге өтетін болды.

Ақындар айтыс барысында өңірдің өзекті мәселелерін тілге тиек етуді ұмытпады. Мәселен, аймақтағы ауыз судың, Бозжырадағы қонақ үй мен «Қошқар ата» қалдық қоймасының мәселесі айтылды.

Айта кетейік, кеше сөз шеберлерінің додасына келген ақындар мен қазылар алқасын облыс әкімі Серікбай Трұмов қабылдады.

Махаббат Нұржанқызы

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.