18 мамыр - Халықаралық музейлер күні Ә.Кекілбаев атындағы Маңғыстау облыстық тарихи-өлкетану музейінде салтанатпен тойланды. Іс-шарада музейдің дамуы мен қоғамдағы мәртебе-беделінің биік болуына еселі еңбек еткен сала ардагерлері мен қызметкерлеріне құрмет көрсетілді. Маңғыстау өңірінде музей ісі 1932 жылдан бастау алған екен. Оның игі бастауында Нұртілеу Несібеков тұлғасы тұрғандығы мәлім. Ал сол жылы ашылған Тарас Шевченко музейінің алғашқы директоры Сатанғұл Тәжиев есімді азамат.
Мерекелік басқосуда сөз сөйлеген П.Сармурзина ұлт тарихын, оның салт-дәстүрі мен әдет-ғұрыпын, өзіндік болмысын бейнелейтін жауһар жәдігерлерді жинақтауда, ұлттық құндылықтарды ұлықтау мен насихаттауда музейлердің маңызы орасан зор екендігін тілге тиек етті. Сондай-ақ ол Маңғыстау облысы әкімі орынбасарының алғыс хатын бірқатар музей қызметкерлеріне табыстады. Салтанатты шарада «Қазақстан салалық мәдениет, спорт, туризм және ақпарат қызметкерлерінің кәсіптік одағы» Маңғыстау облыстық филиалы төрағасы Н.Мұқанов сөз сөйлеп, музей саласы мамандарының терең білім мен алғырлыққа, табандылық пен ізденімпаздыққа негізделген жанкешті еңбегіне тәнті екендігін айтып, алғысын жаудырды.
Замана заңғары, сөз зергері Ә.Кекілбайұлының 80 жылдық мерейтойы қарсаңында бой көтерген музей жұмысының қалыпты қызметі мен ілгері дамуына айтарлықтай қолдау танытқан компаниялар мен жеке серіктестер де мереке күні назардан тыс қалмады. Музей басшылығы НКОК, «Каспий жылу, су арнасы» МКМ, «Жас батыр» спорт мектебі, «Талап Маңғыстау» ЖШС, «Еврострой-А» ЖШС ұжымына арнайы сертификаттар табыс етті.
Әлемде теңдесі жоқ әдеби мұра «Қырымның қырық батыры» жырын қайта жаңғыртушы, осы заманаға дейін жеткізген Мұрын жырау Сеңгірбекұлының домбырасы 20-ғасырдың 80 жылдары Алматыдағы халық аспаптар музейіне тапсырылған екен. Таяуда белгілі меценат Төкен Танаұлы Жұмағұловтың демеушілігімен домбыра көшірмесі жасалып, музейге әкелінген. Мерекелік іс-шара барысында музей директорының орынбасары Нұрболат Қыдырұлы домбыраны Түпқараған ауданындағы Мұрын жырау музейіне табыстады. Сондай-ақ «Музейге сый» акциясы аясында халық ақыны, жыршы Сәду Қайралапұлының ұрпағы Елжас Қожабек жәдігерлер қорын ақынның домбырасы және бас киімін әкеліп, толықтырды. Бұдан бөлек музей ардагері Ғалия Хибадуллақызы Бекет ата мешіті бейнеленген кілемшені сыйға тартты.
Мерекелік шара аясында музейдің екінші қабатында жаңадан жасақталған археология залының ашылу рәсімі өтті.
«Музей ісі ғылыми-зерттеу жұмыстарына негізделген мың салалы мамандық. Мықты музей маманы бол үшін ауқымды энцеклопедиялық білім қажет. Мен музейді 25 жыл басқардым. Рухани жаңғырудың, ұлттық кодты танудың ең үлкен тетігі – музей. Бүгінгі қоғамда музейлердің дамуына қолдау көрсету жағы көңіл көншітпейді. Тек мемлекет қана емес, өз ұлтының тарихына жанашыр, елжанды азаматтар тарапынан бетбұрыс қажет. Жоғары оқу орындарында сапалы музей ісі мамандарын дайындауға көңіл бөлінсе құба-құп», - дейді Маңғыстау облыстық тарихи-өлкетану музейінің ғылыми хатшысы Тамара Қалмырзақызы.
«Мен музейде кіші ғылыми хатшылықтан бөлім басшысына дейінгі кәсіби сатылардан өттім. Музей тынысы маған таңсық емес. Ол ең алдымен ұлттық тарихымыз бен жадымыздың қасиетті қоймасы. Мыңдаған жылдар бұрын тарыдай бытыраған тас қиыршықтардан құнды жәдігерлерді қайта құрау табандылықты, төзімділікті, ерен еңбекті қажет етеді. Музей мамандарының жұмысы көп көзге түспегенімен, осындай көрмелер мен залдарда керемет көрініс табады», - деп атап өтті «Огни Мангистау» газетінің редакторы М.Қалағанова.
Голрох ЖЕМЕНЕЙ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
