Ақтауда екі жүзге жуық адамға несие рәсімдеген ұйымдасқан топ мүшесі сотталды

Ақтау қалалық сотында күдікке ілінген азаматқа қатысты қылмыстық іс қаралды, деп хабарлайды mangystaumedia.kz.

Тергеу органы оны ұйымдасқан топқа қатысып, алаяқтық жасаған (ҚК 262-бабы 2-бөлігі, 190-бабы бабы 4-бөлігінің 1,2)-тармағы) деп айыптады.

«Сотталушы И. «Каспий Банк» АҚ-да банк қызметкері бола тұра, ұйымдасқан топтың мүшесі болып, өзіне жүктелген қылмыстық рөлді атқарып, 13 жәбірленушіге несие рәсімдеген. Сонымен ұйымдасқан топпен 177 жәбірленушіге несие рәсімделген.

Жәбірленушілердің аттарына несие рәсімдеу барысында ақшалай алынған қаражатты қылмыстық топ иемденген, нәтижесінде сотталушы И. жәбірленушілерге 41 237 252 теңге сомасында залал келтірілген» деп жазылған соттың хабарламасында.

Сотталушының кінәсі жәбірленушілердің жауаптарымен, автонесие рәсімдеген шарттарымен, ақша аударымдарымен және өзге де істегі материалдармен дәлелденді.

«И. ҚК-тің 262-бабының 2-бөлігі, 190-бабының 4-бөлігі 1,2)-тармағымен, 58- бабының 3-бөлігімен кінәлі деп танылып, оған 8 жыл мерзімге бас бостандығынан айыру жазасы тағайындалды», деп жазылған Ақтау қалалық сотының баспасөз қызметі таратқан ақпаратта.

Үкім заңды күшіне енген жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.