Ақтауда телефон «террорисі» сотталды

Ақтау тұрғыны Алматыда орналасқан «Нұрбанктің» бас офисіне телефон шалып, 4-шағынаудандағы Ақтау филиалын жарып жіберетінін айтқан.

Сотта анықталғандай, сотталушы А., 29 қаңтар 2018 жылы, сағат 15.40 шамасында қасақана, терроризм актісі туралы көрінеу жалған хабарлау мақсатында Алматы қаласында орналасқан «Нұрбанк» АҚ-ның «25-52» санды тегін линиясына соғып «Будем взрывать филиал банка в городе Актау», - деп терроризм актісі туралы жалған хабарлаған.

Ақтау қалалық сотының баспасөз қызметінің хабарлауынша, бұл қауіп туралы ести сала, «теракт» болғалы тұрған жерге Маңғыстау облысы ІІД, облыстық ТЖД, сондай-ақ жедел жәрдем қызметкерлері дереу жиналған. Оперативті тексеру кезінде телефон қоңырауы хабарламасы жалған екендігі анықталды.

Қоңырау шалған азаматты бірден анықтап, полиция тұтқындады.

Ақтау қалалық сотының үкімімен сотталушы ҚР Қылмыстық кодексінің 273-бабы (Терроризм акты бойынша жалған хабарлама берілді)  бойынша айыпты деп танылды.  Оған ҚР ҚК 63 бабы бойынша 1 жыл 6 ай мерзім бас бостандығынан айыру жазасы берілді. ҚР ҚК-нің 63-бабына сай  тағайындалған бас бостандығынан айыру жазасы сол мерзімге шартты деп саналып, пробациялық бақылау белгіленген, - делінеді Ақтау қалалық сотының сайты.

Заңды үкім әлі күшіне енген жоқ.

Айгүл ДӘДЕН 

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.