Маңғыстаулық полицейлер мерген қыздарды анықтады

©

Көктем мезгілімен қатар келген қыз-келіншектер, аналар мерекесіне орай Маңғыстау облысы ішкі істер органдарында қызмет ететін қыз-келіншектер арасындағы дәстүрлі «Мерген қыздар» сайысы өтіп, оған 26 қызметкер қатысты.

- Ішкі істер департаментінің бастығы Қ.Таймирденовтің бұйрығына сәйкес 8 наурыз халықаралық әйелдер мерекесіне орай мерген қыздар арасында сайыс ұйымдастырып отырмыз. Сайыс Макаров тапаншасы бойынша статикалық, тактикалық екі жаттығудан өтуде, - деді арнайы даярлық басқармасының бастығы Ермахан Аққозиев.

Ішкі істер департаментінің қызметкерлері айына екі рет ату даярлық сабағынан өтіп, тәжірибесін шыңдап тұрады.

- Бұл - керемет сайыс. Ішкі істер органында қызмет атқаратындықтан қандай тәуекелге де дайын болуымыз керек. Қолымызға бірінші рет қару ұстап тұрған жоқпыз. «Мерген қыз» атану үшін бәріміз де тырысып жатырмыз, - дейді ІІД штаб басқармасының бөлімше бастығы Ақмарал Көкенова.

Бір қызығы ату даярлық сабағында көрсетілген жаттығуларды әйел қызметкерлер тез меңгеріп алады екен. «Өйткені олардың саусақтары басу шүріппесіне өте икемді»,- дейді Ермахан Шермаханұлы.

«Мерген қыздар» сайысына қатысушылардың бірі ІІД анықтау басқармасының аға анықтаушысы Баян Кащиева бұл сайысқа бірнеше рет қатысып, үнемі алдыңғы қатарлардан көрініп жүр. Ол өз жетістігінің құпиясын былай жеткізді.

- Қазақстан Республикасының Ішкі істер министірлігінің 127-ші бұйрығына сәйкес ережелерді сақтаймын. Нысанаға қарап көздеп, шүріппені баппен басамын. Одан басқа құпиясы жоқ.

Сайыстың қорытындысы бойынша командалық есепте ІІД арнайы даярлық басқармасы бірінші орынды жеңіп алды.

Статикалық атудан Штаб инспекторы Наталья Евстегнеева ерекшеленді. Тактикалық атудан Жаңаөзен қалалық ІІБ Ювеналды полиция тобының инспекторы Искра Асалова жылдамдығымен көзге түсіп, жеңіске жетті. Екі жаттығуда да екінші орынды Жылдам қимылдайтын арнайы жасақтың инспектор психологы Айгерім Ибатулаева жеңіп алды. Сайс соңында ІІД басшылығы мергендік танытқан аруларды марапаттады.

Суреттерді ІІД баспасөз қызметі ұсынды

[gallery td_select_gallery_slide="slide" ids="49557,49554,49556"]