Ақтауда есірткіні жарнамалайтын 500-ден астам түрлі граффити жазу өшірілді

Ақтау қаласында есірткіні жарнамалайтын граффити жазуларын жою бойынша рейдтік шаралар өткізілді, деп хабарлайды mangystaumedia.kz.

16 шілде мен 16 тамыз аралығында Есірткі қылмысына қарсы іс-қимыл басқармасының қызметкерлері Маңғыстау облысы ПД кинологиялық қызмет орталығының кинологтарымен бірлесіп және қызметтік-іздестіру иттерін қолданумен Ақтау қаласының шағынаудандары бойынша 10-нан астам рейдтік іс-шара өткізді.

Рейд шеңберінде бояу арқылы есірткі заттарын сатуды жарнамалайтын 500-ден астам түрлі граффити жазулар жойылды.

Рейдтік іс-шараларды өткізу шеңберінде халық арасында есірткіні пайдаланудың қауіптілігі және олардың ағзаға әсерінің зияндылығы, есірткінің заңсыз айналымына кепілгерлер немесе курьерлер рөлінде қатысу қауіптілігі, есірткі қылмысына қарсы іс-қимыл және кінәлі адамдар үшін қатаң жазалау бөлігінде қылмыстық заң туралы түсіндіру жұмыстары жүргізілді, делінген МО Полиция департаментінің баспасөз қызметі таратқан ақпаратта.

Рейдтік іс-шаралар ең алдымен азаматтардың құқықтық санасын арттыруға, есірткіге қарсы иммунитетті қалыптастыруға және қоғамда салауатты өмір салтын белсенді насихаттауға бағытталған.

Рейдтік іс-шаралар тұрақты түрде өтеді. Оған еріктілер, "Жас Отан" жастар қанатының мүшелері және Ақтау қаласының барлық ерікті азаматтары қатысады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.