Дәрігер: Вакцина - әлемде коронавирустың таралуына тосқауыл болатын жалғыз амал

Алматыдағы Фтизиопульмонология орталығының эпидемиолог дәрігері Гауһар Нағашыбекқызы коронавирустан қалай қорғану керектігін айтты, деп хабарлайды ҚазАқпарат.

Гауһар Нағашыбекқызының айтуынша, оның 65 пен 68 жас аралығындағы ата-анасы өздерін қауіпті аурудан қорғау үшін коронавирусқа қарсы екпені өз еріктерімен әрі саналы түрде алған.

Ал дәрігердің өзі жұмыс істейтін Фтизиопульмонология орталығы ұжымының 90% екпе салдырды.

«Менің отбасым, достарым, таныстарым да вакцина алды. КВИ-ге қарсы екпе алу - менің саналы таңдауым. Мен өзімді ғана емес, айналамдағы барлық адамдарды, жақындарымның қауіпсіздігіне жауаптымын», – деді дәрігер.

Ол барша қала тұрғындарына, соның ішінде КВИ-мен ауырған адамдарға да қайтадан дерт жұқтыру қаупінің жоғары екенін айтты.

Сондай-ақ профилактикалық шараларды елемеуге болмайтынын тілге тиек етті.

Дәргердің айтуынша, өзіңізді коронавирус инфекциясын жұқтырудан қорғау үшін бәріне белгілі шараларды сақтау қажет: адам көп жиналатын орындарға, әсіресе жабық үй-жайларға бармау; әлеуметтік қашықтықты (кемінде бір метр) сақтау, әсіресе респираторлық инфекцияның белгілері болса; қорғаныс бетпердесін тағу және уақытылы ауыстырып отыру; қоғамдық көлікте сирек қатынау және бөлмені мүмкіндігінше жиі желдету.

Сондай-ақ қолды спирті бар өніммен таза ұстау немесе сабынмен жуу қажет.

Мысалы, қоғамдық орындарға барғанда есік тұтқалары мен крандар және телефон дисплейлерін ұстағанда санитарлық ережені сақтау қажет.

«Өз денсаулығыңызды нығайтып, иммунитетті көтеру үшін қарапайым ережелерді орындау жеткілікті: дұрыс тамақтану, уақытылы ұйықтау, позитивті психологиялық көзқарас қажет. Сонымен қатар таза ауада серуендеу керек. Сондай-ақ жаттығу жасап, спортпен айналысу керек. Осы қарапайым шаралар иммунитеттің күшті болуына әрі кез келген инфекциямен күресуге көмектеседі», – деді эпидемиолог.

Сондай-ақ спикер коронавирус жұқтырғаннан кейін ағзаны қалпына келтіру бойынша өзінің кәсіби ұсыныстарын айтты.

Оның айтуынша, аурудың таралуы, адамның қалай тамақтанатынына, иммунитетіне, белсенді немесе пассивті өмір салтына байланысты.

COVID-19 дертімен ауырған және посткоидті белгілері бар әрбір науқасқа дәрігердің белгілі бір ұсыныстары беріледі.

Коронавирусты қалпына келтіру жеке жүреді. Бірақ бәріне иммунитетті нығайту, дұрыс тамақтану және физикалық белсенділік сияқты шаралар ескертіледі.

Дәрігер мегаполисте халықты COVID-19 дертіне қарсы вакциналау қажеттілігі жайлы ақпараттандыру бойынша белсенді жұмыс жүргізілгенін жеткізді.

«Біздің қалада вакцина пункті барлық жерде бар және ол қолжетімді. Адам көп жиналмас үшін емханалар мен СОСО-да уақытша мобильді пункттер ашылды. Сондай-ақ қосымша арқылы вакцина рәсімінің күні мен уақытын белгілеуге болады. Екпе кабинеті мен пункттерінде аймаққа бөлу үшін әлеуметтік қашықтық талаптары сақталады. Әрбір науқас міндетті тексеруден өтіп, дәрігердің рұқсатынан кейін вакцина алады. Вакцинадан кейін әр науқас 30 минут дәрігердің бақылауында болады. Кейін оның денсаулық жағдайы бекітілген емхананың бақылауына өтеді», – деді ол.

Дәрігердің айтуынша, коронавирус инфекциясына қарсы вакцина қауіпсіздіктің белгісі.

Егер адам вакцина алса, онда ол аурудан қорғалып қана қоймайды, сонымен қатар басқа адамдарға жұқтырмайды.

Соның ішінде жаңа «дельта» штамына қатысты вакцина ауру мен өлімнің ауыр түрлерінен қорғайды. Бұл жағдайда препараттың екі дозасын да алу керек.

Бірінші доза антиденелердің аз мөлшеріне байланысты қорғаныс әсерін береді, екінші доза біріншісінің әсерін күшейтеді әрі нығайтады.

«КВИ вакцинасы – бұл жаңа ауруға қарсы дәрі. Бұл вирусты зерттегенімізге бір жарым жыл өтті. Сондай-ақ вакцина қысқа мерзімде жасалды. Бұл әлем бойынша коронавирустың таралуын төмендететін құрал. Ақпан айында жаппай вакцина басталған кезде медицина қызметкерлері вакцинаға алаңдаушылық білдірді. Кейіннен көп елдерде жанама әсер болмағанын көрді. Қазір адамдардың сенімі пайда болды. Таныстар, туыстар, көршілер вакцинаның қайсысы жақсы деп сұрайды. Ал вакцинадан қорқатын қала тұрғындары түрлі қауесеттер мен жалған ақпараттарға сенеді. Сондықтан біз қызметкерлер мен науқастарға вакцина туралы түсіндірме жұмыстарын жүргізудеміз. Сонда ғана адам тиісті шешім қабылдай алады. Бүгінде вакцина жайлы күрделі мәселе жоқ, халықты қамту процесі қарқынды жүріп жатыр», – деді спикер.

Сөз соңында дәрігер қала тұрғындары мен қонақтарын қоғамдық орындарда демалудан бас тартуға шақырды.

Коронавирус дертін жұқтырмас үшін санитарлық қауіпсіздік шараларын, соның ішінде бетперде режимі мен әлеуметтік қашықтықты сақтауды ұсынды.

Сондай-ақ коронавирустан қорғанудың жалғыз әрі сенімді әдісі вакцина екенін тағы да ескертті.