Ақтауда тұрғындарды вакциналау қарқыны қалай

«Sofiemed Group» емханасында вакциналау қарқынды жүріп жатыр. Қазіргі таңда мамандар күн сайын 250-ге жуық адамға вакцина салады, - деп хабарлайды mangystaumedia.kz сайты.

Бүгін аталған емханаға бардық. Ерікті түрде екпе алуға келгендерді көрдік. Кезек күтіп тұр. Ал емхана мамандары тұрғындарды көп күттірмей, қызмет көрсетіп жатыр.

Алдымен тұрғын арнайы дәрігердің қарауынан өтеді. Онда қан қысымын өлшейді, температурасын бағамдайды, жүрек соғысын тыңдап, келушінің аллергиясы, қатерлі ісік пен созылмалы аурудың бар-жоғын анықтайды. Содан соң анкета толтыртып, екпе алуға рұқсат береді. Осылайша әр тұрғын өз таңдауындағы вакцинаны ала алады. Вакцина алғаннан соң 30 минут дәрігердің бақылауында болады.

Екпе алуға келген тұрғынның бірі – Құндыз Сүлейменова. Ақтау қалалық білім бөлімі «Оқушы орталығында» жұмыс істейді. Ол вакцинаға қатысты ел ішінде айтылып жатқан түрлі пікірден гөрі, әркім өзіне сеніп, шешім қабылдағаны дұрыс деп отыр.

«Өзімнің, отбасым мен әріптестерімнің саулығы үшін вакцина алуға шешім қабылдадым. Отбасымда бұған дейін ешкім екпе алмаған еді. Мүмкін, менен кейін екпе алатын шығар. Ал туыстарым мен әріптестерімнің көбі вакцина алды. Ешқандай ауырсыну, жанама әсер байқалмады. Бастысы – еліміз тыныш болсын, халқымыз ауырмай, өз денсаулығын күтінгенін қалаймын», - дейді қала тұрғыны Құндыз Сүлейменова.

«Sofiemed Group» клиникасының дәрігер-эпидемиологы Қайрат Нұрниязұлының айтуынша, емханада «СпутникV», «QazVac», «HayatVac» және «СoronaVac» вакциналары бар. Осы уақытқа дейін 6 000-ға жуық адам вакцинаның бірінші компонентін алды. Ал 4 500 адам вакцинаның екінші компонентін салдыртқан.

«Емханада 4 екпе бригадасы бар. Оның екеуі емханада болса, қалғаны – жылжымалы екпе бригадасы. Жалпы клиникаға 30 мыңға жуық тұрғын тіркелген. Яғни 3, 3 а, 3 б, 2, 1 шағынаудандары мен Приморский тұрғындарына қызмет көрсетіледі. Шамамен 15 000 адам екпе алады деп жоспарлап отырмыз»,- дейді емхана директоры Нәдірқожа Әбиденұлы.

Оның айтуынша, вакцина екі жағдайда рұқсат етілмейді. Атап айтқанда, қысқа мерзімде ауырып жүрген науқастарға уақытша салынбайды, сонымен қатар онкологиялық, аллергиялық ауруы бар науқастар, жүкті және емізулі әйелдер екпе алмайды. Олар учаскелік дәрігердің қарауынан өтіп, арнайы комиссия арқылы вакцина алмайтыны туралы анықтама алуы керек.

Содан 33 шағынауданда орналасқан «Дина» гипермакеті жанындағы жылжымалы диагностикалық медициналық кешенге келдік. Мұнда да кезек күтіп, қағаз толтырып жатқан тұрғын көп.

«Дәл қазір ресейлік «СпутникV» вакцинасын алып шықтым. Вакцинаны саналы түрде өзімнің, жақындарымның денсаулығы үшін алдым. Яғни қоғамдағы өз жауапкершілігімді сезіндім. Қазіргі жағдайда осылай ғана айналама зиян тигізбеймін деп ойлаймын», - дейді қала тұрғыны Аян Өтесінұлы.

Қарақия аудандық аурухананың дәрігері Гүлжан Избасованың айтуынша, жылжымалы егу пункті 9 шілдеден бері тұр. Күніне 100 адам келіп, өз таңдауындағы вакцинаны салдыртады. Көшпелі егу пункті сағат 10:00-ден кешкі 20:00-ге дейін қызмет көрсетеді.

Жұлдызай ҚАЛИЕВА

Суреттерді түсірген Талант ҚҰСАЙЫН