Маңғыстауда АИТВ инфекциясы жастар арасында көп тараған

Қазіргі қоғам жан-жақты ақпараттармен қамтылған, көп жайттардан хабардар. Алайда, неге екені белгісіз, жұқпалы аурулардың таралуы әлем бойынша азаяр емес. Әсіресе, АИТВ инфекциясын жұқтыратындар қатары азаймай келеді. Мамандардың айтуынша, мұның басты себебі — қан арқылы жұғатын вирус тек қана есірткі қолданушылар мен жеңіл жүрісті адамдардың арасында кезігеді деген жалған түсінік.

ЖИТС-ке қарсы күрес және оның алдын алу жөніндегі Маңғыстау облыстық орталығының статистикасына көз жүгіртсек, биылғы 1-тоқсанда өңірімізде АИТВ инфекциясымен 13 адам тіркелген. Олардың арасында 10 адам Қазақстан Республикасының, 3-і шет елдер азаматтары. Өткен жылғы осы уақытта АИТВ инфекциясымен 9 адам тіркелсе, оның 8-і ҚР азаматтары болған.

Облыстық орталықтың профилактикалық және эпидемиологиялық қадағалау бөлімінің эпидемиолог дәрігері Айәсем Есенжолова АИТВ инфекциясы облыстың барлық аудан-қалаларында тіркелгенін айтады.

- Қазіргі таңда АИТВ инфекциясымен өмір сүріп жатқан адамдарды қоғамның қабылдауы осы кезге дейін біршама қиындықтар туғызып отыр, - дейді ол.

- Қоғамда әлі кезге дейін аталған инфекция тек қана халықтың осал топтарының арасында болады деген пікір бар, бұл дұрыс емес. Бүгінде АИТВ инфекциясы бойынша жағдай өзгерді және АИТВ инфекциясы тәртібі дұрыс адамдарда да кездеседі. Әсіресе, жастар арасында көбірек. Оның ішінде 20-49 жастағыларда осы инфекция анықталып, барлық тіркелген жағдайдың 80 пайызы жастарға тиесілі болып отыр. Сондай-ақ АИТВ инфекциясы әйелдерге қарағанда ер азаматтар арасында 3 есе жиі тіркеледі. Алғашында АИТВ инфекциясы жұмыссыздар арасында, яғни қоғамда белгілі орны жоқ адамдарда тіркелген болса, қазіргі таңда 50 пайыз жұмыс жасайтын адамдар арасында анықталып отыр. Қоғамдағы дені сау адамдар арасында тіркелгендіктен, АИТВ инфекциясы жыныстық қарым-қатынас арқылы беріледі деуге негіз бар. АИТВ инфекциясы анықталған адамдармен тексерілуге дейінгі және тексерілуден кейінгі кеңестер беріліп, адамдарға құқығы мен міндеттері, алдын-алу туралы түсінік жұмыстары жүргізіліп, жақын қатынастағы адамдары тексерілді. АИТВ инфекциясы анықталған адамдар облыстық ЖИТС-ке қарсы күрес және оның алдын алу жөніндегі облыстық орталықта диспансерлік есепке алынып, тегін антиретровирустік ем қабылдауда. Қазақстан Республикасы АИТВ инфекциясы бойынша шоғырланған сатыда, яғни аталған дерт қадағалануда. Республикада АИТВ инфекциясына қарсы адамның ағзасында вирусты төмен деңгейде ұстап тұратын белсенді дәрі-дәрмектер бар.

Бір өкініштісі — осы кезге дейін аталған инфекцияға қарсы вакциналар мен ағзада вирусты толықтай жоятын дәрі-дәрмектердің шығарылмауы. Қоғамда әр адам өзінің денсаулығына жауапкершілікпен қарап, АИТВ инфекциясы бойынша статусын білгені жөн. Ол үшін құпиялы, ерікті, тегін тексерілуден өтуге болады. Тексерілу үшін тұрақты мекен жайы бойы бойынша тіркелген емханаға баруға немесе Ақтау қаласындағы 3 шағын аудан, 170-ғимаратта орналасқан облыстық ЖИТС орталығына келуге болады. Ал АИТВ инфекциясы бойынша сұрақтар туындап жатса, 50-40-49 сенім телефонына немесе орталықтың www.antispid.kz сайтына хабарласа аласыз.

Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.