Ақтауда 68 жастағы науқасқа күрделі ота жасалды

Жақында Маңғыстау облыстық ауруханасының ангиографиялық зертханасында 68 жастағы науқасқа «CRT-D» имплантациясы бойынша ота жасалды. Отаны Нұр-Сұлтан қаласынан арнайы келген дәрігер Аян Әбдірахманов жасады, - деп хабарлайды mangystaumedia.kz сайты Маңғыстау облысы денсаулық сақтау басқармасының баспасөз қызметіне сілтеме жасап.

Ақтау қаласының тұрғыны кенеттен өзін жайсыз сезініп облыстық ауруханаға келген. Науқастың қан тамырын тексеріп, барлық тиісті сынамалары алынған соң жергілікті дәрігерлер Нұр-Сұлтан шаһарындағы Ұлттық ғылыми кардиологиялық орталығының мамандарымен байланысқа шығып, шұғыл түрде ота жасау туралы шешім қабылдады.

«Науқас жүрегінің айдау күші өте төменгі деңгейге түсіп кеткен, нақты айтқанда 31 пайызға дейін төмендеген. Ол кем дегенде 60 пайызға дейін болуы керек. Науқастың жағдайында отасыз болмайды», - дейді Аян Әбдірахманов.

Бүгінде жүрек соғысы қалыпты емес науқастар көп. Олардың жүрек аритмиясы қалыпты жұмыс жасамаса жүрек кенеттен тоқтауы мүмкін. Сол себепті жүрек қағысын бақылап отыруға арналған күрделі компьютер іспеттес қондырғыға сұраныс артқан.

«Адам ұйықтап жатып-ақ қайтыс болуы мүмкін. Мұның себебі жүректің дұрыс соқпауынан немесе тоқтап қалуынан болады. Бұл ретте жүректің электр ширатқышындағы дефибилятор автоматты түрде қосылып, әлсіз жүректі қайта іске қосады. Яғни, жүректің дұрыс жұмыс істеуін қадағалайды. Биыл Маңғыстау өңірінде 20 адам осындай жолды таңдап, «CRT-D» имплантациясы бойынша ота жасатуға келісім берген», - дейді Қайрат Төлеп.

Айта кету керек, бұл құрылғы өз жұмысын бір сәтке тоқтатпай, жүрек қызметін қадағалап отырады. Дефибриллятор бар болса уайымдауға негіз жоқ, құрылғы өзі жүрек қағысының бұзылуын анықтап, қажет кезде электроразряд арқылы қалыпты жағдайға түсіреді. Негізінен бұл құрылғыны қондыра алатын білікті дәрігерлер әзірге тек Алматы және Нұр-Сұлтан қалаларында ғана бар. Маңғыстау өңірінде өздігінен қоятын дәрігер жоқ, бірақ осындай білікті мамандарды шақыртып, олардан тәлім алу арқылы үйренуге мүмкіндік беріліп отыр.

Маңғыстау облыстық ауруханасының ангиографиялық зертханасының бөлім меңгерушісі Қайрат Төлептың айтуынша, соңғы 10–12 жылда еліміз жүрекке ота жасаудың түрлі әдістерін қолдану бойынша алға шыққан. Яғни дәрігерлер ашық жүрекке, тамырға, құлақшаға және т.б. күрделі оталарды жасап жатыр. Былтыр Маңғыстау облыстық ауруханасының кардиохирургиялық орталығында 1 500-ден астам науқасқа ота жасалған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.