Ұлы Абайдың 175 жылдығына республикалық мүшайра өткізіледі

Халқымыздың ұлы ақыны, жазба әдебиеттің негізін қалаушы философ ағартушысы, саясаткер, ұлы Абай Құнанбайұлының туғанына 175 жыл толуына орай мемлекет көлемінде, халықаралық деңгейдегі іс-шаралар жалғасын табуда.

Президент Қ.К.Тоқаев «Абай және ХХІ ғасырдағы Қазақстан» атты мақаласында: «Абайды білу – өзіңді тану. Өзін-өзі тану және адамның тұрақты дамуы, ғылым мен білімнің басымдығы – жетілудің көрінісі. Бүгінде Абайдың сөзі жас ұрпақтың бағдары болуы тиіс», – деп атап көрсеткен болатын.

Қос ғасырдың тоғысар тұсында «Ғылымды іздеп, дүниені көздеп» екі жаққа үңілген ұлы Абай, халықты өркениеттің өріне алып шығар амалды тапты. Ол ғылым мен білім, өнер үйрену жолы еді. Абай шығармашылығы уақыт озған сайын дәуір талабына сай әр қырынан өсіп, өркендеп отыратын асыл мұра болып ұрпақтар санасында орын алады.

Ұлы Абайға арналған ірі шаралардың қатарында Педагогикалық Ғылымдар Академиясы ҚР Ақпарат және қоғамдық даму министрлігі және «Азаматтық бастамаларды қолдау орталығының қолдауымен заманауи әдебиет пен журналистиканы кеңінен насихаттау, жас жазушылар мен ақындардың шығармашылық әлеуетін көтеру мақсатында «Абайдың 175 жылдығына арналған «Мүшайра» республикалық жас ақындар конкурсын ұйымдастыру бойынша іс-шаралар кешенін өткізу» жобасын жүзеге асыруда.

Жоба аясында әлеуметтік желілерде (Инстаграм, Телеграм, Facebook) – апта сайын челлендждер мен викториналар өткізілуде. Әр аптаның ұтыс қоры 100 мың теңге. Оған кез-келген 16-29 жас аралығындағы азамат қатысып, жүлдені жеңіп ала алады.

Сонымен қатар, қыркүйек айында қазақ тілінде кәсіби әдеби жазба дағдыларын үйрету арқылы жас жазушылардың, ақындардың, журналистердің және жастардың басқа да санаттарының шеберлігін арттыру бойынша тренинг, белгілі ақын-жазушылармен «Өз талантыңды қалай ашуға болады және қалай жазу керек» тақырыбында кездесулер мен мастер-класстар өткізіледі.

Бүгінде «Педагогикалық Ғылымдар Академиясы» ҚБ ұсынысымен Маңғыстау облысы бойынша өңірлік ұйымдастырушы ақпараттық-насихаттық жұмыстарды жүйелі ұйымдастыруда. Өңірлік ұйымдастырушының мәліметі бойынша 16-29 жас аралығындағы оқырмандарымыздың назарына осы жоба аясында ұйымдастырылатын республикалық мүшайра жөнінде ақпарат ұсынбақпыз. «Байқауға Ұлы Абайдың шығармашылығына қатысты талапкерлердің жазған шығармалары қабылданады: 2 өлең (ақындар үшін) немесе 2 шағын проза (жазушылар үшін). Шығарманың тілі-қазақ/орыс тілдері.

Жұмыстар баспа немесе электронды түрде ұсынылады. Байқау іріктеу және қорытынды кезеңде өткізіледі. Іріктеу кезеңі өңірлерде 10 тамыз – 30 қыркүйек аралығында өткізілсе, қорытынды кезең 1 қазан – 20 қазан аралығында жүргізіледі. Іріктеу кезеңі нәтижесі бойынша анықталған 3 жүлдегерге республикалық байқауға жолдама берілетін болады. Жас ақындардың жазушылардың шығармашылық әлеуетін дамытуды көздеген мүшайраның жүлде қоры төмендегідей.

Бас жүлде иегеріне 500 мың теңге берілсе, 1 орын иегері 300 мың теңгемен марапатталады. Ал 2-орын жүлдегеріне 200 мың теңге сыйақы мен 3-орын жеңімпазы 100 мың теңгеге қол жеткізе алады. Осы ретте байқау онлайн жағдайында өткізіліп, қаржы үнемделген жағдайда жүлде қорының ұлғаюы мүмкін екенін айта кеткеніміз жөн.

Қатысушы талапкерлер үшін Маңғыстау облысы бойынша өңірлік ұйымдастырушының 87013384972 байланыс телефоны мен Abai175_man@mail.ru поштасы ұсынылады. Облыс бойынша аудан, қалалардың әкімдіктеріне ақпараттық хат жіберілді, талапкерлерді тіркеу жұмыстары жүргізілуде», - дейді өңірлік ұйымдастырушы.

Республикалық конкурсқа қатысушылардың өмірбаяндарының ақпараттық жинағы жеке кітаппен дайындалады және шығарылатын болады.

Жалпы байқаудың ашықтығы мен жариялылығын қамтамасыз ету үшін республикалық кезең бейнетаспаға жазылады.

Талапкерлердің туындыларын бағалауда тақырыбының хакім Абай мен оның шығармашылығына қатысты болуына, өлеңдердің тақырыптық, идеялық мазмұны мен көркемдік деңгейіне ерекше көңіл бөлінеді. Атап айтқанда, шығарма идеясы және композициялық тұтастығы, тілдің стилистикалық және тілдік сауаттылығының сақталуы, әдеби тілінің байлығы, қазіргі заманның өзекті мәселелерін көтере білуіне басты назар аударылады. Осындай талап тұрғысынан шығатын өлкеміздіңталантты жас арқалы ақын-жазушыларын аламан жыр бәйгесіне қатысып, өз бақтарын сынауға ша­қырамыз.

Өңірлік ұйымдастырушы - Ш. Есенов атындағы Каспий мемлекеттк технологиялар және инжиниринг университетінің Қазақ филологиясы кафедрасының меңгерушісі, филология ғылымдарының кандидаты, доцент А. Н. Отарова

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.