Түпқараған ауданының әкімі халық алдында есеп берді

Аудан әкімдерінің халық алдындағы есептік жиыны бүгін Түпқараған ауданында өтті. Жақында ғана аудан әкімі болып тағайындалған Айбек Қосуақов 2019 жылда атқарылған баяндамаға тоқталып, алдағы жоспарларымен бөлісті, - деп хабарлайды mangystaumedia.kz сайты Маңғыстау облысының әкімдігіне сілтеме жасап.

Аудан халқының саны жыл сайын артып келеді. 32432 халқы бар ауданның биылғы көрсеткіші 9,7%-ға өскен. Аудан бюджетінің 4,5 % әлеуметтік салаға, 37% білім беруге, 2% мәдениет пен спортты көтеруге, 25% инфрақұрылымды дамыту мен коммуналдық қызмет саласына жұмсалды. Негізгі капиталға салынған инвестиция көлемі 56,7 млрд теңгені құрады.

"Түпқараған ауданы облыстағы мұнай өндірісінің 23,2 пайызын ұстап отыр. Өткен жылы 4,1 млн тонна шикі мұнай өндірілді. Өнеркәсіп өнімдерінің қалған түрлері тас өндіру, ток пен су шығару, өнім өңдеу аудан экономикасының дамуына аса бір үлкен үлес қосып тұрған жоқ. Бұл көңіл аударарлық жағдай. Келешекте өнеркәсіп өнімдерін өндірушілермен жеке кездесіп, мәселені оңғарту жолын қарайтын боламыз", - деді Айбек Қосуақов.

Елді-мекендерде жеке тұрғын үйлер құрылысы өрістеп келеді. Атап айтсақ Ақшұқыр және Сайын Шапағатов ауылдарында құрылыс жұмыстарының көлемі 16,8 млрд теңгені құрап, 147%-ға орындалған. Шағын және орта кәсіпкерлікпен айналысуға ынталы жандар көбейіп, оң өзгеріс байқалады. Қазір бұл салада 4068 адам өз кәсібін дөңгелетіп отыр. Кәсіпкерлік нысандары 19,5 млрд теңгенің өнімін шығарып, пайыздық көрсеткіші 52,1%-ға артқан.

«Аграрлық несие корпорациясы» арқылы жалпы құны 172,4 млн теңге болатын 39 несие алынып, нәтижесінде 52 жұмыс орны ашылды. Ауданның ауыл шаруашылығы өркендеп, төрт түліктің өсуінде ілгерілеу бар. Қазіргі уақытта 317 шаруа қожалығы жұмыс істеп тұр. Оның ішінде 286 шаруашылық мал өсірумен, 31-і егіншілікпен айналысады. Төрт түліктің өсуі мен өнім өндіруде өзгеріс бар. Мал мен құс 2018 жылмен салыстырғанда 101,3 пайызға өсіп, 594,2 тоннаны құрады. Егіншілік біртіндеп тамшылата суару әдісіне көшуде. 2019 жылы ауданда 31 шаруа қожалығы 220 га жерге егін екті. 5 жылыжайдан 248 тонна өнім алынды.

Сонымен қатар қазіргі уақытта аудан бойынша үй кезегінде 805 адам тұр. Азаматтардың баспанаға сұранысын қанағаттандыру үшін 2019 жылы Форт-Шевченко қаласынан 48 пәтерлік 1 тұрғын үй, 16 пәтерлік 1 тұрғын үй және 8 пәтерлік 2 тұрғын үйдің құрылыстары басталған. Биылғы жылы пайдалануға берілмек. "Нұрлы жол" бағдарламасы бойынша 1,4 млрд. теңге несие бөлініп, Форт-Шевченко қаласы мен Баутино ауылына ауыз су құбырын тарту жұмыстары жүргізілуде. Жоба аяқталысымен Форт-Шевченко қаласының ауыз су желісі 90% қамтылады. Ал Таушық ауылынан 20,7 шақырымдық ауылішілік су құбырының құрылысы аяқталып, пайдалануға берілді", - деді аудан әкімі.

Сайын Шапағатов ауылдық округіндегі тұрғындар санының өсуіне байланысты 1200 орындық мектептің құрылысын жасақтауға тапсырыс берілді. Бөбекжаймен қамту 100%-жуықтады, 22 балабақша жұмыс істеп тұр. Аудан тұрғындарын жұмыспен қамту бойынша өткен жылы 2401 жұмыс орны құрылды. 1143 адам тұрақты жұмысқа, 1258 адам уақытша, 114 адам жастар практикасына жолданды.

Есептік кездесуден соң облыс әкімі сөз сөйлеп, аудан бойынша қордаланған бірнеше мәселелерді талқылады. Тұрғындар тарапынан түскен сауалдарды тыңдап, жауапты мамандарға тиісті тапсырмаларын жүктеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.