Қызылөзен ауылының әкімі есеп берді

Кеше Түпқараған ауданының әкімі Айбек Қосуақов және Қызылөзен ауылының әкімі Өскінбай Ермекбаев халық алдындағы жылдық есебін берді, - деп хабарлайды mangystaumedia.kz сайты Түпқараған ауданы әкімдігінің баспасөз қызметіне сілтеме жасап.

Түпқараған ауданындағы халқы ең аз ауыл – Қызылөзен. Ауылда әкімшілік, мәдениет үйі, орта мектеп, медициналық пунк , «Қазпошта», т.б халыққа қажетті әлеуметтік нысандар үздіксіз жұмыс жасайды. Өткен 2019 жылда атқарған жұмыстарына жасаған қорытынды баяндамасында Ө.Ермекбаев: 964 тұрғын тұратын ауылда электр энергиясымен қамту жолға қойылып, ауыл бойынша барлық көшелер жарықпен қамтылды. Ұлттық телеарналар 168 үйдің 155 үйіне орнатылды. Бос тұрған үй саны – 13, ұлттық телеарна тарату бойынша көрсеткіш – 100%. Ауылдың санитарлық тазалығын «Алау Аят» мекемесі жүргізеді. І.Нысанбаев пен С.Сисенбаев көшесіндегі қоршаулар ішіндегі отырғызылған 280 тал шыбық күтіліп, суарылып, бапталуда, - деген ауыл әкімі ауыл мектебінің жәй-күйі, ондағы педогогтердің білім жетілдіру курстарынан өтуі, оқушы балалардың ыстық тамақпен қамтылуы, жазғы лагерь жұмыстарының ұйымдастыруы жақсы деңгейде екенін айтты. 50 орындық ауылдағы «Толағай» балабақшасы «Step bu step» (Тәй-тәй технологиясы) бойынша жұмыс жасайтыны да баяндамада қамтылған.

Ауыл тұрғындарының көптен бері сұранысы – ауылішілік су құбырын тарту мен ауылдың айналма жолы деп аталып кеткен 9 км тас жолын жөндеу жұмыстары осы жолы да айтылды. Осы сұрақтарды көтерген ауыл тұрғыны Назар Түркпенбаев ауыл жастары үшін жабық спорт зал керектігін тағы ескертті. Сонымен қатар, ауылға қарасты «Сәубет» жерінен шаруашылықпен айналысам дейтін азаматтарға тегін 10 га жер беруін сұрады. Бұл сұрақтарға жауап берген аудан әкімінің орынбасары Ж.Қайнарбаев: су тақырыбы ауыл тұрғындарының бұрыннан көтеріп келе жатқан мәселесі. Бұрын жоба жасалып, аяқсыз қалды. Қызылөзен ауылы айналасында тұрақты су көзі аз болып тұр. Тек тасымалдауға жетіп тұр. Экспертизадан шығару үшін тұрақты су көзін анықтау жұмыстары жүріп, 22 км қашықтықтан су қоры бар жер табылды. Ауылға дейінгі 9 км жолды орташа жөндеу үшін осы жылдың 8 қаңтары күні мемлекеттік конкурсқа берілді. Енді 2 айдан кейін жеңімпаз анықталса, жазға таман жұмысы жүретін болады. Бюджеттен 66 млн. теңге қарастырылған, - деді.

Жиын соңында аудан әкімі Айбек Қосуақов ауыл тұрғындарының өтініштері елеусіз қалмайтындығын, оларды шешу бойынша нақты шаралар қабылдайтынын жеткізді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.