Қарақия ауданының әкімі ардагерлермен көрісті

14 наурыз - Амал мерекесінде аудан әкімі Сымбат Төретаев, аудандық мәслихат төрағасы Жанғабыл Қалаубай, құқық қорғау органдарының басшылары мен әкім орынбасарлары аудандық ардагерлер үйіне барып, қол алысып, аман-саулық сұрасып, дәстүрлі мерекелерімен құттықтады, деп хабарлайды mangystaumedia.kz аудан әкімдігінің баспасөз қызметіне сілтеме жасап.

- Құрметті ардагер ағалар! Сіздерді 14 наурыз – Амал мерекесімен шын жүректен құттықтаймын! Амал – Көктем келіп, күн мен түннің теңелетін шағында, қыстың қыспағы мен қиындығынан аман-есен шыққан елдің еңсесі көтеріліп, адамның аузы аққа, малдың аузы көкке тиетін берекелі мереке. Биыл өңірімізде Амал мерекесі халықаралық деңгейде тойланып жатыр. Батыстан бастау алған осынау ежелгі салтымызды жаңғыртып, ел болып жоғары деңгейде тойлап жатыр. Осы орайда, сіздермен көрісіп кеткенді жөн санадық. Мереке құтты болсын! Дендеріңізге саулық, отбасыларыңызға шаттық тілеймін,- деді аудан басшысы Сымбат Төретаев.

Сонымен қатар, ұлттық мереке аясында ауылдағы жасы үлкендердің үйіне барып, құрмет көрсетті. Көрсеткен ізеттеріне риза болған үлкендер өздерінің баталарын беріп, ақ тілектерін жеткізді.

Айта кетейік, бауырмалдылықты насихаттайтын ізгілік ілтипаты мол күнді атап өту Қарақия ауданында кең көлемде ұйымдастырылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.