Мұнайлы ауданында "Менің атым - Ұзақбай..." атты жыр кеші өтті

Ф. Оңғарсынова атындағы мәдениет үйінде аудан әкімдігінің қолдауымен "Менің атым - Ұзақбай..." атты жыр кеші өтті, - деп хабарлайды mangystaumedia.kz

Жыр-термешілердің кәусар бұлағынан сусындатқан шара Маңғыстау өңірінен шыққан көрнекті жыр перендерінің бірі, Адайдың Қырымқұл ауылының перзенті, халыққа ақындық, жыршылық өнерімен танылып, жұртшылықтың қошеметіне бөленген Ұзақбай Қазжанұлының шығармашылығына арналды.

Шараны өңірге белгілі «Сөз бен саз» бағдарламасының авторы әрі редакторы, ақын Бердіхан Әлмен тізгіндеді.

Жыр кешінде көркем өнердің көркін қыздырған Бекенжан Ертөлеп, Нұрлан Мақсұтов, Қайырбек Теңел, Жүзімгүл Рейпназарова, Бүркіт Елбаев, Жансұлу Әбдімәжит, Әділ Аяпберген сынды жыршылар көзі қарақты көрерменнің құлақ құрышын қандырды.

Сахнаның шымылдығы ақын Сабыр Адайдың “Маңғыстау” атты шығармасымен ашылды. Туындыны Әділ Аяпберген нақышына келтіріп, әуелетіп орындап берді.

Одан әрі жыршылар кезек-­кезегімен Сәттіғұл мен Сүгірдің, Өмір Қараұлы мен Ұзақбай Қазжанұлының өсиет-­термелерінен жырлар айтты.

Жан­-жақтан келген жыршы­-термешілердің өнерін ортаға салған шарада аудан әкімінің орынбасары Н. Мұстафаев аудан әкімінің атынан құттықтау сөз сөйлеп, бұл іс-­шараның маңызына тоқталып өтті. Жыр кешін өткізуге атсалысқан азаматтарға, өнер ұжымдарына жылы лебізін жеткізіп, рақмет айтты.

Әсем әуен, сырлы саз, мың құбылған мақам көпшілік көрерменнің көңілін бір көтеріп тастады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.