Айбынды ел арқауы – Ата Заң

Тарих беттерін парақтап отырып, ұлы хандықтың төл тарихына терең үңілдім. Арада ғасырлар өтсе де өткен күндер мен кемел келешектің ортасын байланыстырар бүгінгі күннің дәурені жүріп тұр.

Замана сырғып өтсе де, өткен күн келмеске кетсе де кешегінің бәрі тасқа қашалғандай, айқын түрде тарихқа тізілген. Соның ішінде әр дәуреннің салты мен дәстүріне берілген бағасындай боп кеткен кемшінді түзеуге арналған ақиқатқа бағдар болатын әділдік жолына тоқталсам деймін.

Бәрі ұлы хандықта билік басына келген «Қасым ханның қасқа жолынан» басталғанды. Халық арасындағы ақиқат пен әділдікті, теңдікті айшықтайтын заң дәстүрін «Есім ханның ескі жолы жалғады». Болашаққа бағыт алған хандықта хақ пікірді заң санайтын Тәуке ханның «Жеті жарғысы» жарық көрді. Аталы сөзге тоқтаған арда елдің ерлері ескерген ескі күннің заң емлесі еліміз еңсесін тіктеп егемендік алғаннан соң «Ата Заң» деген атау да әр азаматтың мүддесіне орай халық жайына негізделіп құрылды. Ұлы хандықтан түбі бастау алып, тәуелсіздік тұғырында зайырлы мемлекет атанған Қазақстан үшін Ата Заң – басты құжат. Баптар мен тараулар тоғысқан төл жинақ елдің басты байлығы – ел азаматының өмірі деп тайға таңба басқандай көрсеткен. Барша халықты басты байлығына балайтын ел үшін Ата Заң – кешегі мен бүгінгіні топтастырған тірек іспетті. Ата Заң - кемелдік кепілі. Ата Заңда аталған әр бөлім, әр бап, тарау мен тармақ терең негізде құрылған, жүйелі жасақталған. Әлихан Бөкейхан айтқандай, «Заң адам пайдасына жазылады, адам заң үшін тумайды ғой». Расында да баянды болашаққа бағдар алған егемен елдің ережесі ел азаматтарының пайдасына шешілетін шешуші құрал сынды. Бұл құрал — тұғырлы елдің негізгі тізгіні, тірегі! Биыл басты тірегімізге — 25 жыл. Азат елдің Ата Заңы — жалынды 25-те.

Ақиқаттың хақ жолына бастайтын Ата Заңымыз кемел келешектің кепілі екендігі де ақиқат. Олай болса, елім барда ережем де болары хақ. Азат елім мен Ата Заңым жасай берсін!

М. Адаев,
Бейнеу ауданы прокуратурасының прокуроры,
І сыныпты заңгер