Маңғыстау облысында "Otpannews.kz" ақпараттық сайты іске қосылды

Бүгін, 23 тамыз күні Қазақстанның медиа кеңістігінде жаңа БАҚ дүниеге келді. «Маңғыстау медиа» медиахолдингінде «Otpannews.kz» ақпараттық порталының тұсаукесері өтті.

Жаңа сайт заман талабы мен аудитория талғамына сай жасақталған. Портал қазақ, орыс, ағылшын тілдерінде хабар таратады. Салтанатты шараға өлкемізге белгілі қоғам қайраткерлері мен шетелдік консулдықтардың өкілдері, партия, мекеме басшылары және депутаттар мен журналистер, блогерлер қатысты.

ҚР Мәдениет және Ақпарат министрі Аида Балаева жаңа ақпараттық порталдың ашылуымен арнайы құттықтап, жеделхат жолдады. Министр құттықтауында аймақтағы ақпараттандырудың маңыздылығын атап өтті.

«Маңғыстау медиа» ЖШС директоры Гүлмира Әбішеваның айтуынша, сайт Маңғыстаудағы ең биік нүкте – Отпантаудың атауын иеленді. Бұл тарихи орын - халқымызды бір мақсат пен мүддеге тоғыстырған, ел хабаршысы болған қасиетті мекен.

«Маңғыстау медиа» медиахолдингі тез өзгеріп жатқан медиа саласындағы әлемнің ең озық тәжірибелерін меңгеріп, жұмыс барысында қолдануға ерекше маңыз береді. Осы бағыттағы алға қойған жоспарларымыздың бірі – заман талабына сай, техникалық мүмкіндігі жоғары ақпараттық портал ашу болатын. Оның үстіне өзге өңірлердегідей емес, Маңғыстауда бұқаралық ақпарат құралдарының, оның ішінде интернет сайттарының саны аз. Аталған олқылықтардың орнын толтыру мақсатында жаңа жобамызды жүзеге асырдық. Бүгіннен бастап көзі қарақты көрермен мен ойлы оқырманға жаңа «Otpannews.kz» сайты қызмет етеді. Жаңа ақпараттық порталда тәжірибелі тілшілер мен жалындаған жас журналистер еңбек етеді», - деді Гүлмира Әбішева.

Мерекелік шарада сөз алған Маңғыстау облысы әкімінің орынбасары Тілеген Әбішев жаңа сайттың ашылуымен құттықтап, ұжымға толайым табыс тіледі.

«Ақпарат саласы дамыған кезеңде медианың маңызы зор. Otpannews.kz сайты атына заты сай болып, ақпарат шыңында болуын тілеймін. Шынайы әрі жедел хабар таратып, оқырманның көзайымына айнала берсін», - деді Маңғыстау облысы әкімінің орынбасары Тілеген Ақанұлы.

Жиынға ақын, Қазақстанның еңбек сіңірген қайраткері, халықаралық «Алаш» сыйлығының лауреаты, Президент сыйлығының иегері Сабыр Адай қатысып, құттықтау сөзін айтты. «Бұл — жүректерінде ұлтына деген перзенттік махаббаты бар жастардың бастамасы мен қадамы. Талаптарыңа нұр жаусын. Өрелерің «Отпандай» биік болсын!», - деді ақын Сабыр Адай.

Сондай-ақ Otpannews.kz-тің тағы бір жаңалығы – «Жолбаян» радиосымен интеграция жасауы. Енді сайт жаңалықтары радио тыңдармандарына да жол тартады. Ақпараттық порталда жаңалықтар мен журналистік зерттеулерден өзге «Түбектен түлегендер», «Ел аузында», «Эксклюзив» атты жаңа айдарлар бар.

Сайтта жарық көрген ақпараттарды әлеуметтік желілер мен мессенджерлерде жариялайтын әлеуметтік медиа маркетингі де жолға қойылған. Инстаграм әлеуметтік желісіндегі «Сіз білесіз бе?» айдарында көнерген сөздер, бүгінгі күні көп естіле бермейтін, ұмыт болған салт-дәстүрлер хақында сауалнама жүргізіледі. Сонымен бірге өңірдегі ерекше кейіпкерлер таныстырылады.

Шара барысында сайттың шеф-редакторы Ольга Золотых ҚР Мәдениет және Ақпарат министрлігінің «Ақпарат саласының үздігі» төсбелгісімен марапатталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.