Жаңаөзенге Құлсары қаласынан эвакуацияланғандардың алғашқы легі келді

Құлсары тұрғындары Жаңаөзен қаласындағы “Каспий жоғары педагогикалық және салалық технологиялар” колледжіне орналастырылуда, деп хабарлайды “Жаңаөзен” газеті.

Колледжде 50 адамға арналған орын дайындалған. Десек те, аталған эвакуациялық пункке бүгінге дейін 70-ке жуық адам тіркелген. Эвакуацияланған тұрғындарды колледж жататын жермен, азық-түлікпен қамтамасыз етуде.

77 жастағы Құлсарылық ақ жаулықты әже Нұрсұлу Тайманова қиын-қыстау кезде пана болып, құшақ жая қарсы алған жаңаөзендіктерге алғысын білдірді.

Алайда тұрғындар су тасқынына байланысты үйлерінен ешнәрсе алып шықпағандықтан, оларға киім-кешек пен гигиеналық заттар керек. Көмек қолын созам деушілер колледжге керекті заттарды апара алады.

Бүгінгі таңда топан судан зардап шеккен тұрғындарға номері 1 ЖГП-ның 1-ші бөлімінің мамандары гигиеналық заттар, балаларға арналған киімдер әкелсе, “KMG ceatring” ЖШС-дан нан өнімдерін жеткізді.

Колледж басшысы Исембай Қалдаманов Құлсарыдан келген адамдардың балаларына жаңа киім сыйлап, жеке балабақшасы мен мектебіне қабылдауға дайын екенін айтты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.