Маңғыстауда өңірлік кадр резервіне іріктеудің сұхбат кезеңі аяқталды

Жобаның бұл кезеңі ҚР Мемлекеттік қызмет істері агенттігінің Маңғыстау облысы бойынша департаменті мен өңірлік әкімдіктің бірлесуімен өтті, деп хабарлайды mangystaumedia.kz ҚР Мемлекеттік қызмет істері агенттігінің Маңғыстау облысы бойынша департаментінің баспасөз қызметіне сілтеме жасап.

Маңғыстау облысында алғаш рет Өңірлік кадр резервіне іріктеу өткізілді.

Жобаның мақсаты-прогрессивті және белсенді жас басқарушылар пулын қалыптастыру, аймақты дамыту бойынша жұмысқа талантты және белсенді жастарды тарту.

Конкурстың соңғы кезеңі 19-21 тамыз аралығында облыс әкімі Нұрдәулет Қилыбайдың төрағалығымен өтті.

Облыс әкімінің қатысуымен болған кадр комиссиясында Іріктеудің төртінші кезеңі «комиссиядағы құрылымдық сұхбат» кезеңіне жолдама алған 40 үміткер өз жобаларын салалық бағыттар бойынша қорғап, идеяларды іске асыру кезеңдерін ұсынып, ықтимал проблемалар мен нәтижелерді талдады.

Жобалардың бағыты да әртүрлі: индустрия және өнеркәсіп, экономика және қаржы, әлеуметтік сала, цифрландыру, экология және т.б

Әр баяндамада комиссия талдама мен білімнің тереңдігін, кандидаттардың коммуникативтік дағдыларын бағалады. Комиссия құрамында қоғамдық бірлестіктердің, БАҚ өкілдері және салалық сарапшылар болды.

Маңғыстау облысының Өңірлік кадр резервіне өткендердің тізімі мемлекеттік қызмет істері агенттігінің және облыстық әкімдігінің ресми сайттарында 26 тамызда жарияланады. Іріктеуден өткендердің барлығы екі жыл ішінде «Б» корпусының мемлекеттік әкімшілік лауазымдарына тағайындаулар ала алады.

Айта кетсек, еліміздің барлық аймақтарында өңірлік кадрлық резервтерге іріктеудің алғашқы кезеңі 1 наурызда басталған болатын. Маңғыстау облысы бойынша барлығы 301 кандидат құжат тапсырып, оның 294-і тестілеудің бірінші кезеңіне тіркелді. Іріктеу кезеңінің Заңнаманы білуге арналған тестілеуден 128 кандидат, олардың ішінен жеке қасиеттерін бағалауға арналған тестілеуден 52 кандидат сәтті өтті. 52 кандидаттың 47-сі құзіреттерді бағалауға тіркелді. Іріктеудің төртінші кезеңіне 40 үтіткер «комиссиядағы құрылымдық сұхбат» кезеңіне жолдама алған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.