©
Биыл 1 қыркүйекте бастап ата-аналарының келісімімен мектептердегі 11 жасар қыз балаларға АПВ-ына қарсы екпе жұмыстары жүргізіледі, деп хабарлайды mangystaumedia.kz сайты.
Дәрігерлердің айтуынша, Адам папиллома вирусы (АПВ) екпе жұмыстарын жүргізу арқылы алдын алуға болатын қатерлі ісік.
- Жатыр мойны обыры - 100 пайыз алдын алуға болатын, вирустық этеологиясы анықталған ауру. Вирус анықталған жағдайда жатыр мойны обыры сынды қауіпті кеселге сеп болады. Аталған вирус жыныстық жолмен әрі тұрмыстық жағдайда жұғатыны анықталған. Әлемдік медицина ғалымдарының айтуынша, жатыр мойны обырына шалдыққандардың 99,7 пайызы - адам папиллома вирусын жұқтыратыны дәлелденген. Екпе жұмыстары 11 жастағы қыз балаларға (жыныстық өмірдің алғашқы тәжірибесіне дейін) ата-аналарының келісімімен мектептерде жүргізіледі. 40 жасқа дейінгі әйелдер ақылы түрде екпе салдыра алады, - деді облыстық онкологиялық диспансерінің дәрігері, медицина ғылымдарының кандидаты Баян Бекетова.
Бірқатар Еуропа елдерінде АПВ-ына қарсы екпе жұмыстары 2008 жылдан бері мемлекеттік бағдарламаға енгізілген. Еліміз әлем бойынша бұл қатерлі ісікті жұқтырғандардың алғашқы бестігіне кіреді. Ал Еуропа елдері мен АҚШ жатыр мойны обырын толығымен ауыздықтай алған.
- АПВ-ына қарсы екпе жұмыстары екі рет жүргізіледі. Сондай-ақ бұл екпеден адам өміріне келіп-кетер ешқандай қауіп жоқ. Әледік нарықта АПВ-ына қарсы екпе бірнеше елдерде әзірленген. Қазақстан қазір бұл екпені қай елден сатып алатынын нақты айта алмаймыз. Бірақ біз Еуропалық немесе Америкалық вакцина клиникалық сынақтан өткенін және тиісті сертификатқа ие екенін білеміз, - деп түйіндеді өз сөзін Баян Бекетова.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
