Маңғыстауда дзюдодан халықаралық турнир басталды

Бүгін Ақтаудағы «Маңғыстау арена» спорт кешенінде халық батырлары «Иса-Досан» жүлдесіне арналған ХІІІ халықаралық турнир басталды, деп хабарлайды mangystaumedia.kz Қоғамдық коммуникация орталығына сілтеме жасап.

Дүбірлі додада еліміздің 14 облысы мен Әзірбайжан, Өзбекстан мемлекеттерінен келген 700-ден астам спортшы бақ сынайды. Екі күнге созылатын жарыста 2008-2009 және 2011-2012 жылы туған жасөспірім ұлдар мен қыздар бәсекеге түседі.

Спорттық іс-шараның ашылу салтанатында Маңғыстау облыстық спорт басқармасы басшысының міндетін атқарушы Айбек Имашев, ата ұрпағы Нұрпейіс Сәрсенбай және басты ұйымдастырушылардың бірі Манарбек Бисекенов сөз сөйлеп, жарысқа қатысушыларға сәттілік тіледі.

-Бүгін дзюдодан басталған халықаралық доданың басты мақсаты - ұлттық дәстүрлерімізді насихаттау, ел үшін жанын пида еткен баһадүр бабалар ерлігін ұлықтау, рухына тағзым ету, - деді жарыс ұйымдастырушысы Манарбек Бисекенов.

Халықаралық сайыста өңір намысын 300-ге жуық спортшы қорғайды. Саңлақ спортшының бірі - 14 жастағы Асылхан Ғабит 50 келі салмақ дәрежесінде белдеседі.

-Жеті жылдан бері дзюдомен айналысамын. Осы уақытқа дейін бірнеше республикалық және халықаралық спорт жарыстарына қатыстым. Былтыр өткен халық батырлары «Иса-Досан» ХІІ турнирінде өз салмақ дәрежем бойынша чемпион атандым. Биыл да жеңіске жетуге бойдағы бар күш-жігерімді жұмсаймын, - дейді Асылхан Ғабит.

Айта кетейік, жарыста І, ІІ және ІІІ орын алған дзюдошылар ҚР спорт шеберлігіне үміткер деген атаққа ие болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.