Маңғыстау ауданы 95 жылдық мерейтойын атап өтті

Шетпе ауылында Маңғыстау ауданының 95 жылдық мерейтойын атап өтті. Шара аясында «Қарашаңырақ» стеласының және жаңа жаяу жүргіншілер жолы ашылды. Сонымен қатар, іс-шара аясында Жыңғылды, Шайыр, Шебір және Шетпе ауылдарының амбулаторияларына арналған автокөлік кілттері табысталды, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Салтанатты шара «Қарашаңырақ»стеласының ашылуымен басталды. Ауылға кіре берісте орналасқан стеланың ашылуына ауыл тұрғындары мен ақсақалдар және аты аңызға айналған спортшы Әмин Тұяқов пен ауданның құрметті азаматтары қатысты.

Сонымен қатар, «Қарашаңырақ» стелласы мен аудандық аурухананы жалғайтын ені үш метр ал ұзындығы төрт шақырым болатын жаңа жаяу жүргіншілер жолы пайдалануға берілді.

Мерекелік іс-шара одан әрі Әмин Тұяқовтың старт беруімен басталған жүгіру марафонымен жалғасты. Онда әйелдер үш, ал ерлер төрт шақырымды бағындырды.

Жүгіру жарысынан соң бүркіттер мен шабандоз аттардан құралған «Шежіреден сыр шерткен» салтанатты шеруі өтті.

Орталық аллеяда таңертеңгі уақыттан бастап, 17 киіз үй тігілді және бауырсақ-пати ұйымдастырылды. Келген қонақтар қымыз, шұбат ішіп, мерекелік палаудан дәм татты.

Қорытынды іс-шара Тамара Асар, Ақылбек Жеменей, Айгүл Қосанова, Бауыржан Ретбаев, сондай-ақ жергілікті әртістер мен бишілер өнер көрсеткен концертпен аяқталды.

Мерекелік кеште Жыңғылды, Шайыр, Шебір және Шетпе ауылдарының амбулаторияларына, сондай-ақ «Дария» кәсіпорнымен Қызылсай мемлекеттік өңірлік паркіне арналған автомобиль кілттерін тапсыру рәсімі өтті. Жыл соңына дейін балалар тасымалына арналған алты автобус беру жоспарланған.

Кеште өңір басшысы Нұрлан Ноғаев аудан тұрғындарын мерейтойымен құттықтап, ақ тілегін жеткізді.

-Бүгін біз Маңғыстау ауданының 95 жылдық мерейтойын атап өтудеміз, бұл бәріміз үшін қуанышты мереке. Маңғыстау ауданы біздің облысымыздың «Қара шаңырағы» болып саналады. Осы маңызды іс-шара қарсаңында ауданда халықтың әлеуметтік жағдайын жақсартуға бағытталған көптеген қайырымдылық науқандары ұйымдастырылуда және бұл істер әлі де жалғасатын болады. Маңғыстау ауданы өркендей берсін, - деп құттықтауын білдірді өңір басшысы Нұрлан Ноғаев.

Маңғыстау ауданында жыл басынан бері мерейтой аясында ауданның 9 елдімекені мен 12 ауылында он бағыт бойынша «95 жылға арналған 95 игі іс» жобасы іске асырылуда.

Жоба аясында Маңғыстау ауданында жыл соңына дейін бірнеше жұмыстар жоспарланған. Олар:

Бекі елді мекенінде жаңа 100 орындық мектеп салу;
Шетпе ауылында 600 орындық мектеп, сондай-ақ Алшын Меңдалыұлы атындағы мектепке 200 орындық қосымша құрылыс қарастырылған;
Тұщыбек ауылында тағы 160 оқушыға арналған қосымша нысан салу;
Сайөтес ауылында 200 адамға арналған мәдениет үйінің құрылысы;
Қызан ауылы әкімдігінің жаңа ғимаратын және басқа да маңызды нысандарды алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.