Ақтау қаласының әкімі тазалықты сақтауға шақырды

Ақтау қаласының әкімі Ұлықбек Тінәлиев 28-шағын аудандағы дүкен иелерін тазалықты сақтауға шақырды. Шаһар басшысы шағын ауданды аралау барысында дүкен иелерімен кездесіп, қоқысты тастағанда мұқият болу керек екенін айтты, деп хабарлайды mangystaumedia.kz қала әкімдігінің баспасөз қызметіне сілтеме жасап.

Қала әкімі 28-шағын аудандағы дүкен иелеріне қоқыс шығаруға жауапты мекемелермен келісім-шартқа отыру қажет екенін түсіндірді.

- 15-қыркүйек және 15-қазан аралығында қала бойынша сенбілік өткізіліп жатыр. Соған байланысты өз дүкендеріңіздің айналасын қоқыстан тазартуларыңыз керек. Бұдан бөлек, қоқыс шығаруға жауапты мекемелермен келісім-шартқа отыру қажет. Дүкеннің алдында арнайы қоқыс тастайтын жәшік орнату керек. Әрбір кәсіп иесі тазалықты сақтаса, тұрғындар тарапынан наразалық туындамайды. Тазалық ең бірінші өзімізден басталады, - деді Ақтау қаласының әкімі Ұлықбек Тінәлиев.

Шаһар басшысы қалалық кәсіпкерлік және ауыл шаруашылығы бөліміне кәсіп иелеріне түсіндіру жұмыстарын жүргізуді тапсырды. Сонымен қатар, қала әкімі кәсіпкерлерге дүкеннің сыртқы баннерлерін де ретке келтіруді жеткізді.

- Дүкеннің тазалығымен қатар, сыртқы келбетіне де мән беріңіздер. Баннерлерді ретке келтіріп, сыртын да таза ұстаған жөн, - деді қала әкімі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.