Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Каспий теңізінің су деңгейі қайта көтеріліп келеді, деп хабарлайды mangystaumedia.kz 24.kz-ке сілтеме жасап.
Қаңтар мен наурыз аралығында Каспидің солтүстік және шығыс бөлігіндегі су 29 метрге төмен түсіп кеткен. Мамандар мұндай көрсеткіш көптен бері болмағанын айтып отыр.
Теңіз деңгейінің көтерілуіне тасқын су оң әсер еткен. Каспийге құятын Еділ мен Жайықтың суы биыл жылдағыдан көп. Оның ішінде Еділ өзенінің үлесі ерекше көрінеді. Бұл ретте мамандар алдағы жылдары жауын-шашын мол түссе, теңіз кемеріне келетінін айтады.
"Негізгі өзен ол - Еділ. Теңіздің деңгейі негізінен сол Еділге байланысты. Ал енді одан кейінгі сатыда Жайық тұр. Биыл Жайықтан түсетін су көп болып жатыр. Содан кейін Еділден келетін су да арта түскен. Оның бір сағасындағы тоғанды жұлып кетіпті деген кеше хабар келді. Соған қарағанда су жақсы. Егер келесі жылы да, келесі жылдары су жақсы болатын болса, онда Каспий қалпына келеді. Ал келесі жылдары өзендер аз құйса, Каспий тағы төмендеуі мүмкін. Сондай-ақ, теңіз деңгейі күн райына да тәуелді. Егер, күн қатты ысыса, су көп буланады", - дейді техника ғылымдарының кандидаты Әмірхан Кеншімов,
Қазіргі уақытта Каспий маңындағы орташа булану деңгейі 1 метрдің шамасында болып отыр. Ал әзірге теңіз деңгейі көтерілгені көпшілікті қуантып отыр.
"2024 жылғы 22 сәуірдегі жағдай бойынша Жайық өзені – Атырау қаласы маңында су деңгейі 412 см құрады. 2024 жылдың 11 сәуірінен бастап Жайық өзеніндегі деңгейдің жоғарылауы, жоғарылауына байланысты Каспий теңізінің солтүстік-шығыс бөлігінде теңіз деңгейінің жоғарылауы байқалды. Бұл Пешной станциясында теңіз деңгейінің 69 см-ге дейін көтерілуіне жеткізді. Бүгінгі таңда Каспий теңізінің солтүстік шығысындағы теңіз деңгейі минус 28,21 метрді құрайды", - деді «Қазгидромет» РМК ғылыми-зерттеу орталығы басқармасының басшысы Айзат Елтай.
21 сәуір күні Еділ бойындағы Светлый Яр гидробекетінде су деңгейі бір тәулікте 7 см-ге көтеріліп, 742 см-ге жетті. Алдағы уақытта тағы да көтерілуі мүмкін екені айтылуда. Демек алдағы уақытта Каспийге түсетін су көлемі әлі де арта түсуі мүмкін.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.