Қандалаға қарсы у: Ақтау тұрғыны бас бостандығынан айырылды

Ақтау қалалық сотында пәтеріне қандалаға қарсы у шашып, абайсызда көршілерін өлтіріп алған адамға қатысты сот үкім шығарды, деп хабарлайды mangystaumedia.kz сайтының сот процесіне қатысқан тілшісі.

48 жастағы Ақтау тұрғыны былтыр 21 қазанда пәтеріне қандалаға қарсы у шашқан. Кейін химиялық препараттан бөлінген аммиак жоғары қабаттағы пәтерге тарап, тұрғындары уланып, 10 айлық және 2 жасар бала көз жұмды. Мамандар дезинфекция жасалған пәтер ішінен 39 химиялық таблетка тапқан еді.

1976 жылы туған пәтер иесі кінәлі деп танылып, 5 жылға бас бостандығынан айырылды. Судья сот отырысында сотталушының бұрын сотталмағынын айтты. Судья пәтер иесін 304-бабы 3-бөлігі яғни «Санитариялық қағидаларды немесе гигиеналық нормативтерді бұзып, абайсызда екі немесе одан да көп адамның өліміне әкеп соққан іс-әрекеті үшін соттады.

«ҚР қылмыстық процестік кодексінің 382, 387, 390, 392, 393, 395, 398, 401, 402, 404 баптарын басшылыққа алып сот үкім етті. ҚК 304-бабы 3-бөлігі бойынша кінәлі деп танылып, осы бап бойынша 5 жыл мерзімге бас бостандығынан айыру жазасы тағайындалсын. Жазасын ҚК 46-бабы 5-бөлігі 1-тармағына сәйкес қылмыстық атқару жүйесі барынша төмен мекемеде өтеу белгіленсін. Бұлтартпау шарасы ретінде қолданылған үй қамақ бұзылсын. Сот залынан қамауға алынсын. Жаза өтеу мерзімі үкім жарияланған күннен, яғни 18 қаңтар 2024 жылдан бастап есептелсін. Жәбірленушілердің өтемақы қорының пайдасына 51 750 теңге өндірілсін. Процестік шығын мемлекет пайдасына 1 839 565 теңге өндірілсін. Үкім жарияланған күннен бастап 15 тәулік ішінде апелляциялық шағым түсіруге құқылы», - деді Ақтау қалалық сотының судьясы Ақмарал Хасенова.

Айта кетейік, тексеріс жүргізген санитар мамандар пәтер иесінің химиялық препаратты Алматының қара базарынан алғанын айтқан болатын.

Ақтаудың санитарлық эпидемиологиялық станса мамандары пәтерді өз бетінше улауға болмайтынын, тек арнайы мамандардың қызметіне жүгіну керек екенін ескертеді.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.