Қанат Бозымбаев Маңғыстау облысындағы көпжылдық мәселелерді шешу бойынша бірқатар тапсырмалар берді

Маңғыстау облысына жұмыс сапары барысында Қанат Бозымбаев Ақтау қаласының бірқатар негізгі инженерлік және инфрақұрылымдық нысандарын аралады, деп хабарлайды mangystaumedia.kz.

Вице-премьер КОС-2-нің 2-ші кезеңі қуаттылықты тәулігіне 30 мың м3-тен тәулігіне 70 мың м3-ке дейін жеткізу құрылысымен танысты. Нысан 2025 жылы пайдалануға беріледі.

Содан кейін Қанат Бозымбаев қаланың магистральдық жылу желілерін қайта жаңартуды қарады: жобаға сай 2024-2026 жылдар аралығында әкімдік 47 км-ден 44 км магистральдық жылу құбырын кезең-кезеңімен ауыстыруды жоспарлап отыр.

Әрі қарай вице-премьер Мұнайлы, Қарақия, Түпқараған аудандарының тұрғындарын сумен қамтамасыз ететін "Каспий" су тұщыту зауытында болды. Бүгінгі таңда мұнда ауыз судың өнімділігін тәулігіне 20 мыңнан 40 мың м3-ке дейін арттыру бойынша жұмыстар жүргізілуде. Іске қосу-жөндеу жұмыстары осы жылдың қыркүйегіне дейін аяқталады.

Келесі нысан "ҚазАзот" АҚ болды, онда KazAzot Prime жаңа аммиак-карбамид кешенін салу жобасы таныстырылды. Жаңа зауыт 700 тұрақты жұмыс орнын құра отырып, ауыл шаруашылығында қолданылатын Азотты тыңайтқыштар шығарады.

Сондай-ақ, вице-премьер "МАЭК" ЖШС-де болды. Өңірде су тапшылығын азайту үшін кәсіпорын аумағында өнімділігі тәулігіне 24 мың м3 су тұщыту қондырғыларын салу жоспарлануда.

Нысандарды аралау қорытындысы бойынша Қанат Бозымбаев Маңғыстау облысының әлеуметтік-экономикалық дамуының шұғыл шараларын әзірлеу бойынша кеңес өткізді. Жүргізіліп жатқан жұмыстар туралы облысқа келген Ұлттық экономика, энергетика, құрылыс және өнеркәсіп, экология және табиғи ресурстар вице-министрлері есеп берді. Маңғыстау облысы бойынша тіршілікті қамтамасыз етудің барлық салаларын қамтитын 2024-2027 жылдарға барлығы 118 институционалдық жоба жоспарланған. Бұл экономиканы әртараптандыру, тамақ өнеркәсібін дамыту, халықты ауыз сумен 100% қамтамасыз ету, жылу желілерінің тозуын азайту, интернет желілерінің қамтылуы мен сапасын арттыру.

Вице-премьер өңірдің экологиялық проблемаларына жеке тоқталып, Жаңаөзен қаласындағы ҚТҚ стихиялық қоқыс үйіндісінің бұзылған жерлерін рекультивациялауды жеделдетуді, сондай-ақ "Қошқар ата" қалдықтар қоймасын рекультивациялауды аяқтауды тапсырды.

Сонымен қатар, Қанат Бозымбаев аудандардағы, Жаңаөзен қаласындағы жолдардың сапасыздығын атап өтіп, бейінді Министрлікке тиісті тапсырмалар берді.

Әлеуметтік салаға ерекше назар аударылды: облыс халқының әлеуметтік осал топтары үшін жалға берілетін тұрғын үй сатып алу, Жаңаөзен қаласында 18 пәтерлі тұрғын үй салу, Бейнеу ауданында 200 орындық жатақханасы бар 600 орындық колледж салу.

"Білім беру саласында өте маңызды мәселе туындап отыр. Биыл 13 мектептің құрылысы аяқталып, келесі жылы тағы 8 мектеп тапсырылады. Кадрлар қажет. Өңірде оқытушылар мен дәрігерлердің тапшылығы байқалады. Өңір үшін қажетті мамандарды даярлау-стратегиялық мәселе. Мұқият талдау жүргізуді және осы бағытта университеттермен жұмыс істеуді тапсырамын. Біз жергілікті дарынды жастар мен балаларды қолдауымыз керек – НЗМ, РФММ, Дарын және Білім-инновация лицейі сияқты мектептерде оқуға квоталарды ұлғайтуымыз керек. "Қазмұнайгаз" компаниясы еліміздің жетекші мектептеріне 1000-нан астам талантты баланы оқытуға жіберуге дайын. Ал өңірге дәрігерлерді тарту мәселесін тұрғын үймен шешу қажет", - деді Қанат Бозымбаев.

Вице-премьер Маңғыстау облысына сапары барысында, әлеуметтік-экономикалық дамудың шұғыл шаралар жоспарына толықтырулар енгізуге бір апта мерзім берді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.