Ғани Бейсембаев Ақтаудағы оңалту орталығындағы Құлсары тұрғындарымен кездесті

Еліміздің оқу-ағарту министрі Ғани Бейсембаевтың Маңғыстау облысына жұмыс сапарының аясында Ақтау қаласындағы бірнеше эвакуациялық пунктке арнайы барды, деп хабарлайды Mangystaumedia.kz.

Ақтау қаласындағы оңалту орталығында министр уақытша қоныстанған Құлсары тұрғындарымен кездесіп, олардың пікірін тыңдады.

Маңғыстау облыстық жұмыспен қамтуды үйлестіру және әлеуметтік бағдарламалар басқармасының басшысы Әсет Шопанов Ақтау қаласындағы оңалту орталығындағы жұмыс барысының қалай үйлестіріп жатқаны туралы баяндады. Оның айтуынша, мұнда Атырау облысының Жылыой және Махамбет аудандарынан сексенге тарта адам уақытша орналасқан.

"Ақтау қаласындағы оңалту орталығында Атырау облысындағы су тасқынынан зардап шеккен 79 адам орналасты. Жалпы, бұл нысан 300 адамды қабылдауға есептелген. Көшірілген тұрғындарға бір реттік көмек көрсету бойынша құжатын қарап, несие төлейтін адамдардың өтініштерін қабылдап, комиссияға жолдадық. Біз орталыққа азаматтарды бес санат бойынша қабылдаймыз. Оның ішінде 1-2 топтағы мүгедектер, мүгедек баласы барлар, 1 жасқа дейінгі баласы аналар, жүктілік мерзімі 6 айдан асқандар және жалғызбасты зейнеткерлер осында орналасып жатыр. Облыс бойынша барлық эвакуациялық пунктегілердің арасынан аталған санат бойынша құлсарылық тұрғындарды осында жинаудамыз. Сондай-ақ, азаматтарды өз қалауы бойынша таңдаған эвакуациялық орталыққа орналастыруды да ескереміз. Жолаушылар пойызымен келген тұрғындарды теміржол вокзалынан күтіп алып, арасынан біздің орталыққа тиісті адамдарды жеткізіп отырмыз", - деді Әсет Шопанов.

Оңалту орталығында орналасқан тұрғындардың мүмкіндігі шектеулі балаларына тиісті медициналық көмек көрсетіліп, арнайы мамандар жұмыс істеуде. Бұл нысанға 11 сәуірден бастап Атырау өңірінің тұрғындары уақытша қоныстана бастаған.

"Мұнда мұғалімдер келіп, репетитор ретінде жұмыс істеуін үйлестіруді тапсырамын. Онлайн түрде оқудан бөлек, офлайн форматта оқыту ескерусіз қалмауы тиіс. Судан зардап шеккен адамдарға Үкімет тарапынан барлық қажетті көмек көрсетіледі. Сіздерге барынша қолдау көрсетіп, бірге екенімізді жеткізгім келеді. Бәріміз бірлесіп мәселенің барлығын ескерусіз қалдырмай, бұл кезеңнен де өтеміз деп сенемін. Атырау облысынан келген оқушылардың сабағына мән беріледі. Мұғалімдер оқытып, тиісті бағасын табельге қойып, жіберетін болады. Ерекше балалардың білім алуы бөлек. Соларға қажетті ұстаздардың тауып беруді облыстық білім басқармасы назарда ұстайды. Білім саласына қатысты, балалардың ерекшелігіне қатысты жайттар ескерусіз қалмайды. Адамдар мұнда ұзақ уақыт болатын болса, балабақша мәселесін қарап, бөлек топ ашуды қарастыруымыз керек", - деді Ғани Бейсембаев.

Сондай-ақ, министр сырқаты бар жандар үшін қажетті дәрі-дәрмектерді жеткізуді жауапты басшыларға қаперде ұстауды ұсынды.

"Бізде дәрі-дәрмек жеткілікті. Қазіргі уақытта бұған қатысты бізде мәселе жоқ. Ең бірінші кезектегі мәселе ол атыраулықтардың күпті көңілін сейілту. Біздің оңалту орталығының дәрігерлері бар. Қосымша жұмыстың орталықтың мамандары тәулік бойы кезектесіп атқарып, қадағалап отыр", деді МО жұмыспен қамтуды үйлестіру және әлеуметтік бағдарламалар басқармасының басшысы Әсет Шопанов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.