Әскерилер Ұлыстың ұлы күні - Наурыз мейрамын атап өтті

Ақтау гарнизоны теңіз жаяу бригадасының жеке құрамы Ұлыстың ұлы күні - Наурыз мейрамын дәстүрлі түрде атап өтті, - деп хабарлайды mangystaumedia.kz сайты Ақтау гарнизонының баспасөз қызметіне сілтеме жасап.

Мерекелік іс-шара әскери бөлімнің саптық алаңында ұйымдастырылды. Әскери қызметшілердің отбасымен өткізілген іс-шараға мыңдаған адам қатысты. Әскери бөлімнің аумағына киіз үйлер тігіліп, қазақтың ұлттық ойындары арқан тартыс, қазақша күрес, қол күрестіру, гір тасын көтеру және асық ату секілді спорт түрлерінен әскерилер бақ сынасты.

- Бүгінгі өткізілген мерекелік іс-шара жоғары деңгейде өтті, барлық әскери қызметші белсенді қатысты. Наурыз мейрамы қарсаңында баршаңызды шын жүректен құттықтаймын, еліміз тыныш, туған жеріміз аман болып, әрбір жаңа күн әр отбасына шат көңіл, бақыт және береке сыйласын. Ұлыс оң болсын, ақ мол болсын, - деп атап өтті әскери бөлім командирі подполковник Азамат Сулейменов.

Ұлыстың ұлы күніне арналған мерекелік іс-шара жеңімпаздарды құттықтау рәсімімен және көркемөнерпаздар концертімен аяқталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.