Бүгін Ақтауда "Kazakh Tourism" ҰК" АҚ қаланың 60 жылдығына орай ақпараттық тұр ұйымдастырды. Оған облыстың әр өңірінен жиналған 70 бала Каспий теңізіне саяхат жасады, деп хабарлайды mangystaumedia.kz сайты.
Бұл турға Қарақия, Мұнайлы және Түпқараған аудандарынан келген мектеп оқушылары, жетекшілер мен алғашқы медициналық көмек көрсетушілерден бөлек, БАҚ өкілдері де қатысты.
Ұйымдастырушылардың айтуынша, бұл іс-шараның басты мақсаты – облыстағы оқиғалық іс-шалар мен туризмді дамыту.
- Бүгінгі ақпараттық тур – «Mangystau Travel Fest» фестивалі аясында ұйымдастырылған 20 іс-шараның бірі. Осы бағыттағы фестивальдар мен турлар Маңғыстаудан бөлек, Түркістанда да ұйымдастырылады. Бүгінгі тур балаларға ерекше әсер сыйлайтыны анық,- деді «Kazakh Tourism» ҰК» АҚ Туристік өнімдер дамыту департаментінің мененджері Базарбек Қамысбаев.
Маңғыстау облысының ауыл мектептерінде оқитын балаларға арнап ұйымдастырылған тур аясында қатысушылар теңіз катамарандарымен саяхаттады.
Теңіздегі саяхат басталмас бұрын балаларға судағы қауіпсіздік ережелері мен кемедегі тәртіп туралы айтылды.
Катамаран теңіз жағалауы арқылы 14 шағын аудан, 15ш/а орналасқан Амфитеатр және 4 шағын аудандағы жарқабақтар мен теңіз жартастары бағытында жүрді. Саяхат барысында жүріп өткен аймақ ұзындығы – 8-10км құрады.
- Тур ұйымдастырушыларына көп рахмет айтамын. Танымдық бағытта ұйымдастырылған бүгінгі іс-шара балаларға да, ересектерге де ұнады. Осындай саяхаттар туған өлке тарихын біліп, өскен жердің табиғатымен танысуға көп көмектеседі. Сонымен қатар бүгінгі келіп жеткен Ақтаудың 60 жылдығымен барша қала тұрғындары мен қонақтарын құттықтаймын,- деді Қарақия ауданы №5 мектеп директорының тәрбие ісі жөніндегі орынбасары Құндыз Құрманғалиева.
«Kazakh Tourism» ҰК» АҚ ұйымдастыруымен өткен бүгінгі тур балалардың да көңілінен шықты. Жетібайдан келген Дияр Базаровтың айтуынша, саяхат барысында ол Каспий тарихымен танысып, Ақтауға 60 жыл толғанын білген.
- Маған бүгінгі саяхат қатты ұнады. Теңіздің бұрынғы атауларын, бұл жерде мекендеген тайпалар туралы ақпарат білдім. Ұйымдастырушыларға рахмет. Маған барлығы да қызық болды. Ақтаулықтарды қаланың 60 жылдық мерейтойымен құттықтаймын,- деді ол.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
