Ақтаудағы теңіз жағалауын кеміргіштерден тазарту үшін 600 келі дератизациялық препарат қажет

Ақтауда 10 қазан күні кеміргіштерге қарсы дератизация жұмыстары басталды, деп хабарлайды mangystaumedia.kz сайты қала әкімдігінің баспасөз қызметіне сілтеме жасап.

Ақтау қалалық санитарлық-эпидемиологиялық бақылау басқармасының ұсыныс хатына сәйкес қалалық тұрғын үй коммуналдық шаруашылық бөлімі кеміргіштерге қарсы дератизация жұмыстарын жүргізетін мекемені анықтап, келісім-шарт жасақтады. Аталған жұмысты «Медик-гигиенист» өндірістік кооперативі жүргізеді. Дератизация жұмыстарын қазан айының соңына дейін жалғаспақ.

- Аталған жұмыстар теңіз жағалауындағы «Самал» шағын ауданынан бастап «Ақтау теңіз сауда портына» дейін, сонымен қатар Приморск елді мекені, Өмірзақ ауылы және 16, 17 ш/а аумағында жүргізіледі. Егеуқұйрықтардың қаладағы заңсыз қоқыс тасталған аумақтарда да көбейгендігі анықталды. Сондықтан барша қала тұрғындарын қоршаған ортаға құрметпен қарап, қоқысты арнайы жәшікке тастауларын сұраймыз, - деді Ақтау қалалық тұрғын үй коммуналдық шаруашылық бөлімінің сектор меңгерушісі Бахтияр Мақсатов.

Мамандардың айтуынша, дератизация жұмысына қолданылған препараттардың адам өміріне және үй жануарларына ешқандай қаупі жоқ. Кеміргіштерге қарсы дератизация жұмыстары жалпы 20 шаршы км аумақты қамтиды.

- Дератизация жұмыстарын жүргізуде қолданылатын препараттар адам өміріне және үй жануарларына қауіп төндірмейді. Себебі біз дератизациялық препараттарды тек кеміргіштер тығылып паналайтын жерлерде ғана қолданамыз. Мысалы, кеміргіштерге қарсы уды теңіз жағалауындағы үлкен тастардың астына саламыз, - деді «Медик-гигиенист» өндірістік кооперативінің директоры Ольга Смирнова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.