Ақтауда жаяу жүргіншілер жолына ескертпелер жазылуда

Ақтауда 7 шағынаудандағы №1 емхана маңындағы жаяу жүргіншілер өткеліне ескертпелер жазылуда, -деп хабарлайды mangystaumedia.kz сайты қала әкімдігінің баспасөз қызметіне сілтеме жасап.

Аталған шараны Ақтау қалалық жолаушылар көлігі және автомобиль жолдары бөлімі мен қалалық полиция басқармасы бірлесе пилоттық режимде орындап жатыр.

- Қазіргі таңда жол белгілерін орнату, жарықтандыру, қажетті орындарда қоршауларды қолдану және жол таңбаларын салу жұмыстарын орындап жатырмыз. Алдағы уақытта 28х29 ш/а, 14 ш/а «Ынтымақ» сауда орталығы және 1 ш/а «Дружба» дүкенінің маңындағы жаяу жүргіншілер өткеліне ескертпелер жазылады, - деді Ақтау қалалық жолаушылар көлігі және автомобиль жолдары бөлімінің басшысы Асхат Нұрмұхан.

«Назар аударыңыз - балалар!» жедел алдын алу іс-шарасы аясында атқарылып жатқан жұмыстың негізгі мақсаты - жол-көлік оқиғасын азайту.

- Аталған шараның мақсаты - қаладағы жол-көлік оқиғаларының алдын алу, жаяу жүргіншілер мен балалар үшін қауіпсіз жағдай жасау. Сонымен қатар жаяу жүргіншілер өткеліне ескертпе жазу жұмыстары қаланың басқа да шағынаудандарында жүргізіледі деп жоспарлануда, - деді Ақтау қалалық полиция басқармасы Әкімшілік полиция бөлімі жол және техникалық инспекциясы бөлімше бастығы Бақыт Хайруллин.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.