Ақтауда республикалық «Абысын-ажын» байқауы өтті

Ақтауда республикалық «Абысын-ажын» байқауы өтті. Сайысқа өңірімізден 60 келін, көршілес Атырау облысынан 8 келін қатысып, бақ сынады, деп хабарлайды mangystaumedia.kz.

Қоғамдық коммуникация орталығының хабарлауынша, байқаудың басты мақсаты – ұлттық құндылықтарды насихаттау, ақылына көркі сай қазақтың өнерпаз келіндерін анықтап оларды жарыққа шығару. Абысындар арасындағы өнегелі достықты келешек ұрпаққа үлгі ету, жас аналарды ұлттық дәстүрге тәрбиелеу.

Іс-шараға Маңғыстау облыстық мәслихатының төрағасы Жаңбырбай Матаев қатысып, келіндерге сәттілік тіледі.

- Қазақта «Қоғамды тәрбиелегің келсе, қызыңды тәрбиеле» деген мағыналы сөз бар. Ата-бабамыз қызды қадірлеп, төрге шығарған. Қызды тәрбиелей отырып, бүтін бір ұлтты тәрбиелеген. Ұлттық дәстүрді абысынды-келіндер қаймағын бұзбай сақтаған. Сондықтан, бүгінгі байқаудың маңызы орасан зор. Үлгі-өнегені көрсетер жолда осындай шаралардың өтіп жатқаны қуантады. Мағынасы терең, берері мол байқау жыл сайын жалғасын табады деген сенімдемін. Барлық қатысушыларға тек қана сәттілік, жеңіс тұғырынан көріне беріңіздер! , - деді Жаңбырбай Матаев.

Сындарлы сайысқа 7 қазы өз бағасын берді. Олардың қатарында ҚР Президенті жанындағы әйелдер істері және отбасылық-демографиялық Ұлттық комиссияның мүшесі, «Қазақ аналары - дәстүрге жол» қоғамдық бірлестігінің басшысы Айнұр Жүгінісова да болды.

- «Абысын-ажын» байқауы «Қазақ аналары - дәстүрге жол» қоғамдық бірлестігінің үлкен жобасы. Бұл іс-шара да тектен-тек өткізіліп отырған жоқ. «Әйел түзелмей, әлем түзелмейді», «Абысын тату болса, ас көп» демекші, туысқандық қарым-қатынастың жойылған заманында барлығын қалпына келтіру үшін жасалып, ұйымдастырылып отыр, - деді Айнұр Жүгінісова.

Байқау 5 бөлімнен тұрды. Алғашқы бөлімде қатысушылар өздерін таныстырса, екінші бөлімде келіндер өз өнерлерін көрсетті. Келесі бөлімде сұрақтарға жауап берді. Сондай-ақ, қатысушылар талантын әділ бағалау мақсатында фонограммаға тыйым салынды. Сайыста Қожағұл әулетінің атынан қатысып, бақ сынасқан 9 келін болды.

- Әулетімізден 9 келін сынға түсіп жатырмыз. Үлкеніміз 50 жаста болса, кіші абысынымыз 20жаста. Байқау үшін арнайы 2 апта дайындалдық. Сайыс жоғары деңгейде өтіп жатыр. Дәстүрімізді дәріптеп, ұлттық құндылықтарымызды арттыратын осындай байқаулар ұйымдастырыла берсін. Өзімізге тек жеңіс тілеймін, - деді Қожағұл әулетінің келіні Жанар Меңдібайқызы.

Байқау қорытындысы бойынша бас жүлдеге Маңғыстау ауданынан келген Бекмағұловтар әулетінің келіндері ие болды. Ал, 1 орынға Түпқараған ауданынан келген Бөлеевтар әулеті, 2 орынға Бейнеу ауданынан келген Есбергеновтар әулеті, 3 орынға Жаңаөзен қаласынан қатысқан Жетыбаевтар әулеті жайғасты. Барлық қатысушыларға ақшалай сыйлықтар табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.