Ақтауда отбасылық психолог Ержан Мырзабаевпен кездесу өтеді

Ақтауда ертең, 12 қыркүйек күні кәсіби отбасылық психолог Ержан Мырзабаевпен кездесу өтеді, - деп хабарлайды mangystaumedia.kz сайты.

Аталған шараны Маңғыстау облыстық жастар ресурстық орталығы "Lectorium" жобасы аясында өткізеді. Негізгі мақсат - берік қоғам, саналы ұрпақ қалыптастыру. Жас отбасыларға, ата-анаға психологиялық кеңес беру, өзекті тақырыптарды қозғай отырып, мәселенің шешімін табуға жәрдемдесу.

Кездесу екі сессияға бөлінеді. Алғашқы сессия "Өмірлік серікті қалай таңдаймыз?" тақырыбында өтеді. Онда отбасы құрудың маңыздылығы, өмірлік серікті таңдауда мән берілетін негізгі қағидалар мен қасиеттер айтылады. Жастарға кеңес беріліп, сау отбасы құру жолындағы алғашқы қадамдар түсіндіріледі.

Ал екінші сессия жас отбасылар мен ата-анаға арналған. Онда "Бақытты отбасының 7 принципі" сөз болады. Сол арқылы қоғамдағы өзекті мәселе, ажырасу мен отбасындағы кикілжіңнің алдын алуға мүмкіндік беріледі. Мұнан бөлек бала тәрбиесі, баланың қоғамдағы рөлі, ата-анасымен байланысы жөнінде де әңгіме өрбиді.

Отбасылық психолог Ержан Мырзабаевпен кездесу 34 шағынаудан Достық үйінде сағат 14:00-де басталады. Ал екінші сессия сағат 17:00-де өтеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.