Ақтауда мектеп оқушылары атыраулықтарға ерікті ретінде көмек көрсетті

Атырау облысының Жылыой ауданында болған су тасқынынан эвакуацияланған тұрғындардың бір легі Ақтау қаласындағы №10 мектепте уақытша орналасты, деп хабарлайды Mangystaumedia.kz.

Қалағы іргелі білім ошағында бүгінде атыраулықтарға еріктілер көмектесіп жатыр. Олар мектеп іргесінде киіз үй тігіп, азық-түлік тасуға елеулі үлес қосуда.

Мектеп басшысының міндетін атқарушы Нәзира Сәндібекқызының айтуына, Құлсарыдан сексеннен астам тұрғын келген.

"№10 мектепке 84 адам келді. Оның арасында онға тарта адам үйге шықты. Жалпы Құлсарыдан эвакуацияланған адамдар бізге таңертең келді. Қажетті азық-түлікті жастар орталығының еріктілері жеткізіп жатыр. Асты әзірлеушілердің дені мұғалімдер. Ерікті ретінде жоғары сынып оқушылары жұмылды. Бізде лагерьге арналған төсек-орын жеткілікті. Тасқын зардабын тартқан отандастарымызға барынша қолдау көрсетіп, қолдан келген көмекті көрсетіп жатырмыз, - Нәзира Сәндібекқызы.

Аталған білім ордасында оқитын Бүркітбай Аманкелді сыныптастарымен бірге көмектесіп жатқанын атады. Ол қиыншылыққа тап болған тұрғындарға ерікті ретінде көмектесуге бел буған.

"Осы мектепте 10-сыныпта оқимын. Атырау облысында болған су тасқынына байланысты мектептегі эвакуациланған адамдарға көмектесіп жатқан жайымыз бар. Осындай сәтте бір-бірімізді қолдауымыз керек деп ойлаймын. Келген адамдар жайғасып, киіз үйде тамақтанды. Сыныптарымызбен бірге біз қажетті заттарды тасып, сауапты іс жасап жатырмыз. Бұл біз үшін жауапты іс деп санаймын, - деді Бүркітбай Амангелді.

Маңғыстау облысына соңғы үш күнде Атырау облысының Жылыой ауданынан 18 мыңға тарта тұрғын көшірілді. Олардың дені Бейнеу ауданының орталығына, Боранқұл ауылына қоныстанса, елеулі бөлігі Ақтауға уақытша орналасты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.