Ақтауда көше ортасында орналасқан қоқыс жәшігі тұрғындарға кедергі келтіруде

Ақтаулық тұрғындар «Бәйтерек» сауда орталығына қарама-қарсы орналасқан 16 ш/а аялдамасындағы қоқыс жәшігіне шағымдануда. Желі қолданушыларының айтуынша, жаяу жүргіншілер жолында орналасқан қоқыс жәшігі қозғалыс барысында кедергі жасап, адам өміріне қауіп тудыруы да мүмкін, деп хабарлайды mangystaumedia.kz сайты.

- 7 мүшесі сау адам «эй, ақымақ, жолға түсіп айнала сал» деуші еді, бірақ біз қозғалысы шектелген адамдарды да (нәрестелі аналар, мүгедектер арбасы) ұмытпайық. Қаламыз арбалардың қозғалысына 100% бейімделмеген. Оған дәлел американдық горкалар секілді жасалған пандустар,- дейді әлеуметтік желі қолданушылары.

Пост астындағы пікірлер арасында «Басқа жаққа қарай орнын ауыстыруға болмас па екен?», «Тротуардан мініп-түсіп жүргенде машина қағып кетпей ма?» деген секілді пікірлерді де кездестіруге болады. Сонымен қатар қала тұрғындары аталған қоқыс жәшігінің тұрғанына бірнеше жыл болғанын да айта кетті.

- Тұрғындардың арыз-шағымын ескеріп, жақын арада қоқыс жәшігінің орнын ауыстыруға мердігер мекемеге тапсырма берілетін болады,- деді «Ақтау қалалық жолаушылар көлігі және автомобиль жолдары» ММ өкілдері.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.