Ақтауда екі келіні бар ене босанды

Ақтаулық 42 жастағы тұрғын төрт ұлдан кейін қыз босанды. Ана мен бала орталығынан күйеуі, төрт ұлы, екі келіні мен енесі 101 розамен күтіп алды, - деп хабарлайды mangystaumedia.kz сайты.

Перинаталдық орталықтан енесін әсерлі етіп шығарып алуды қос келіні ұйымдастырған екен.

- Бесінші баланың қыз болуын алдын ала жоспарламадық. Сондықтан бұл жаңалық отбасымыз үшін тосыннан келген қуаныш болды. 40-тан асқан соң акушер-гинеколог Тұрсынай Қуанышевна кесер тілігімен босандырды. Қызымның есімін әкесі Айсәуле деп қойды. Ал жеңгелері Еркем деп еркелетіп жатыр. Отбасымыз ерекше қуанып, қошеметпен күтіп алды. Барлығына алғысым шексіз, - деді босанған ана Айнұр Ермұханова.

Айнұр Ермұханова 38 жасында үлкен келінін алған, ал 39 жасында алғашқы немересін бауырына басқан. 40 жасында екінші келінін қарсы алып, қызығын көріп жүр. Қазір 3 немеренің әжесі.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.