Ақтауда бір аулада бірнеше ұлт пен ұлыс өкілі тұрады

Ақтауда былтыр 7 шағынаудан 26 үйдің ауласы абаттандыру және көгалдандыру бойынша «Үздік аула» болып танылды. Мұндағы жасыл желек пен ауладағы көркем өнер туындыларын осы үйдің тұрғындары жасаған. Олар мерекелерді бірге тойлайды, ағаш отырғызады, деп хабарлайды mangystaumedia.kz.

Бұл аулада бірнеше ұлт пен ұлыс өкілі тұрады.

«Бізде қазақтар, немістер, орыстар, украиндар бар. Мен лезгинмін, төменгі қабатта армян, жоғарғы қабатта өзбектер, бірінші қабатта әзірбайжандар тұрады. Бәріміз бірге жоспар құрамыз, біреудің қуанышы болса, бірге қуанамыз, біреудің қайғысы болса бөлісеміз. Мен өзімнің ұлттық тағамдарымды дайындайтын болсам, оны көршілеріммен бөлісемін, ал Пасхада түрлі-түсті жұмыртқалар мен тәттілерді асыға күтемін. Біз әрқашан Жаңа жылды бүкіл үймен қарсы аламыз. Таңертең балалар бір-біріне сыйлық беріп, кешке үлкендер жиналады», – дейді үй тұрғыны Мира Максимова.

Бұл аулада бұрыннан келе жатқан дәстүр бар. Мамыр мерекелерінде бүкіл аула бірігіп, сенбілікке шығады. Тұрғындар алдағы уақытта балалар алаңын жаңартып, ағаштарды әктемек.

«Бірге жұмыс істеу бізді әрқашан біріктіреді. Балалар үлкендердің соңынан еріп, мұның бәрін көреді. Көршілер тарапынан осындай қолдау болғаны, өзара көмек бергені өте жақсы», - деп толықтырды Алина Берра.

«Мен мұнда туғаннан бері яғни 30 жылдан астам тұрамын. Жалпы аула тұрғындары қашанда тату-тәтті, бәрі бірін-бірі таниды. Бұрын бәрінің бас қосатын дәстүрі болмаған. Ал қазір әркім қолдан келгенше бір-біріне көмектеседі», – дейді үй тұрғыны Юрий Богданов.

Осы ауланың тұрғыны Достан Ордабаев та көршілерін мақтай жөнелді.

«Біздің әдемі ауламыз бар. Ешкім көмектен бас тартқан емес. Менің көршім бізге дәрігерлік көмек берсе, мен көршілеріме су құбыры немесе электр мәселелері бойынша көмектесемін», - дейді Достан Ордабаев.

«Барлық тұрғындар мерекелерді бірге тойлаймыз, ауланы көркейтеміз. Өзіміз қолдан келгенін жасаймыз, ойын алаңын сырлаймыз», – дейді үй тұрғыны Игорь Иванов.

Кешкілік жұмыстан кейін аулада осы үйде тұратын түрлі ұлт өкілдері бір шәугім шай үстінде бас қосады. Осылайша алдағы мамыр мерекелеріне де жоспар құрады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.