Ақтауда ақын Сұлтанбек Құдайбергеннің шығармашылық кеші өтті

15 мамыр күні Абай атындағы мәдениет үйінде ақын, өлкетанушы, «Ерен еңбегі үшін» медалінің иегері Сұлтанбек Құдайбергеннің шығармашылық кеші өтті, деп хабарлайды mangystaumedia.kz.

«Сырылы бар жүрекке сыр қамадым...» атты кеште ақынның өлеңдері оқылып, оның сөзіне жазылған әндер шырқалды. Мәдени шараға өңір басшысы Нұрлан Ноғаев, Маңғыстау облысы мәслихатының төрағасы Жаңбырбай Матаев, сонымен қатар шығармашылық зиялы қауым өкілдері қатысты.

Болат Жетекбай, Бақытгүл Бабаш, Әлия Дәулетбаева кештің арнайы қонақтары болды.

- Сіз өлкеміздің тарихын, өнері мен мәдениетін зерделеу арқылы өткен мен бүгіннің арасына көпір салдыңыз. Осының барлығы – сіздің тынымсыз еңбегіңіздің жемісі. Еңбектеріңіз қазірдің өзінде өскелең ұрпаққа жол сілтеп отыр. Жұмыстарыңызды жалғастырасыз деп үміттенемін. Жұмыстарыңызға табыс, зор денсаулық тілеймін, – деді Нұрлан Ноғаев Сұлтанбек Құдайбергенді құттықтап.

Сұлтанбек Құдайберген 1978 жылы Маңғыстау облысы, Қосбұлақ ауылында дүниеге келген ақын, өлкетанушы.

Сұлтанбек Құдайберген «Бану-көктем» жыр жинағын, Маңғыстау өнер шеберлерінің «Баба сарын бабауы» антологиясын, А.Өтешевпен бірге «Маңғыстаудың дәстүрлі жыршылық орындаушылық үлгісін оқыту үлгісі» атты оқу-әдістемелік құралын жасауға еңбек еткен.

Кеш соңында аймақ басшысы Нұрлан Ноғаев Сұлтанбек Құдайбергенді Қазақстан Республикасы Мәдениет және ақпарат министрлігінің «Мәдениет саласының үздігі» төс белгісін табыстады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.