Ақтауда жаңа вокзал құрылысына қатысты қоғамдық тыңдау өтті

Бүгін Ақтау қалалық әкімдігінің бастамасымен 6 а шағын ауданнан темір жол вокзалының бой көтеруіне қатысты қоғамдық тыңдау өтті, - деп хабарлайды mangystaumedia.kz сайты.

Вокзалды "Каскор-Транс Сервис" АҚ жеке инвестиция есебінен салуға ниет білдірген.

"Каскор-Транс Сервис" өкілі қоғамдық тыңдау барысында баяндағандай, инвесторлар жаңа вокзалды көпсалалы әрі сауда-саттық үшін қолайластырылып салуды көздеп отыр. Сондай-ақ олар көлік тұрағын жер астына орналастыру оңтайлы шешім деген пікірде. "Каскор-Транс Сервис" вокзал құрылысын жүргізу үшін германиялық компанияның қызметіне жүгінбек.

Вокзалды заман талабына сай, жолаушылар үшін ыңғайлы етіп салу үшін барлық мүмкіндікті қолдану көзделіп отыр. Жаңа вокзалдың құрылысы 30-50 млн АҚШ долларын талап етеді,- деді германиялық компания өкілі.

Ал темір жол стансасының жалпы аумағы 16 гектар болады деп жоспарланған.

Республикамен байланысатын түбекке тартылған теміржолдағы соңғы аялдама Маңғыстау стансасы. Жиын барысында стансаның қаладан қашық орналасқаны қала тұрғындары үшін ыңғайсыздық тудыратыны - жаңа вокзалдың салынуына бірден-бір себеп болғаны жөнінде айтылды.

Қоғамдық тыңдау барысында қатысушылардың кейбірі 6 а шағын ауданнан вокзал құрылысының басталуына риза болса, кейбірі түбегейлі қарсы болды. Ал енді бірі қалаға бір вокзалдың керектігін айтты. Кейбір тұрғындар вокзалдың қала сыртындағы автоХҚО маңынан бой көтергенін құптады. Ал кейбіреулер Мұнайлы ауданына қарасты Баянды ауылы маңындағы Тамақ стансасынан жаңа вокзалдың салынғанын қалайтын болып шықты.

Десе де, вокзалды салуға ниетті компания соңғы айтылған ұсыныстар өзекті болмайтынын алға тартып отыр. Өйткені, көтеріліп отырған мәселе - қала ішінде вокзалдың болмауы. Вокзал қала сыртынан салынатын болса, онда оны салудың ешқандай да маңызының жоқтығы талқыланды.

Махаббат НҰРЖАНҚЫЗЫ

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.