Ақтаулық егіз Қасым мен Жомарттың «Президент» атанғандарына үш жыл болды

Ақтаулық егіз Қасым мен Жомартты сыныптастары мен достары 3 жылдан бері «Президент» деп атайды. Алайда олар Тоқаев Президент болып сайланған 2019 жылы емес, 2009 жылы дүниеге келген.

Mangystaumedia.kz тілшісі мемлекет басшысының есімі иеленген егіздердің отбасымен кездесіп, сұхбаттасты.

Егіздерге Қасым, Жомарт есімін әжесі қойған.

-Сол жылдары Қасым-Жомарт Тоқаев ел болашағы үшін маңызды лауазымдарда қызмет атқарды. Бірнеше тілді білетін білімді дипломат, білікті саясаткер, мемлекетшіл азамат. Туған айлары да бір. Тұңғыш немерелерім 22 мамырда дүниеге келгенде бірден «Қасым-Жомарттай болсын» деп есім бердім. «Жақсы сөз – жарым ырыс» деген, бүгінде қос құлыншағым ел ағасына ұқсап өсіп келеді», - дейді егіздердің әжесі Зүлфия Жолдасова.

Қасым мен Жомарт үйдің үлкені. Одан кейін Іңкәр мен Кәусар есімді қарындастары өсіп келеді. Қасым дүниеге 3, 200 грамм салмақпен келсе, кішісі Жомарт 2,800 грамм салмақпен туылған. Кішкентайларынан зерек, қағілез болып өсіп келеді. Ақтаудағы №11 мамандандырылған физика-математикалық лицейінің 8-сыныбында оқиды. Қазақ, орыс және ағылшын тілдерінде еркін сөйлейді. Одан бөлек математиканы жақсы көреді. Екеуі де сандарды қосып-алуға жүйрік. Тіл байлығын арттырып, даналықпен сөйлеу үшін көркем әдебиетті, жаңалықтар мен тарихты оқиды. Бос уақытында бокспен айналысады. Екеуі де болашақта дипломат болғысы келеді және аттасы Қасым-Жомарт Тоқаевпен кездесуді армандайды.

Антропонимика ғылымын зерттеген ғалымдар адам есіміне қарай тағдыр қалыптасатынын айтады. Сондықтан да шығар егіздер ес білген сәттен бастап есімнің салмағын сезінеді. Қазір зор жауапкершілікпен атына заты сай болуды мақсат етіп, өсіп келе жатыр. Әкесінің айтуынша, тіпті, кей қасиеттері мемлекет басшысы Қасым-Жомарт Тоқаевқа ұқсайды.

Балалар әрдайым ізденісте жүреді. Түрлі білім жарыстарына, олимпиадаларға қатысып, жүлделі орындарды иеленіп жүр. Мінездері де өте байсалды, коммуникативті, бойында дипломаттың қасиеттері бар. Үлгі тұтқан адамы Қасым-Жомарт Тоқаев теледидардан сөйлегенде әр сөзіне мән беріп тыңдауға тырысады. Көп тіл білу мақсатында қосымша үйірмелерге қатысып, ағылшын тілін жетік меңгеріп жүр. Алдағы уақытта француз, қытай тілдерін үйренгілері келеді», - дейді егіздердің әкесі Ерлан Мәуленов.

2019 жылы Қасым-Жомарт Тоқаев Президент болып сайланғанда балалардан бұрын әкесі Ерлан Мәуленовтың әріптестері қатты қуаныпты. Оның айтуынша, әріптестері «Сіз бәрін білген сияқтысыз» деп әзілдеген екен. Жаңа туған сәбиге тарихи оқиғаға немесе белгілі тұлғаға арнап, есім қою бұрыннан бар дәстүр. Ал елімізде Қасым-Жомарт есімі 2019 жылдан кейін ғана трендке айналды.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.