Ақтауда өткен республикалық ашық чемпионатқа 180-ке жуық спортшы қатысты

Ақтауда тхэквондоның WTF түрінен «Каспий кубогы – 2022» республикалық ашық чемпионаты өтті, деп хабарлайды mangystaumedia.kz облыстық ҚКО-ға сілтеме жасап.

Дүбірлі додада Батыс Қазақстан, Ақтөбе, Қызылорда, Павлодар, Шымкент, Маңғыстау құрамаларынан 180-ке жуық спортшы «Каспий кубогы» үшін таласқа түсті. Жарыстың ең жас қатысушылары небәрі 4 жаста болса, ең үлкені 17 жаста.

Жарыс қорытындысы бойынша Батыс Қазақстан және Ақтөбе облысының құрамалары – ІІІ орын, Қызылорда облысының құрамасы ІІ орын алды. Маңғыстау құрамасы үздік атанып, І орынды иеленді.

- Бұл – «Ғаламдық тхэквондо» федерациясы ұйымдастырып жатқан үшінші жарыс. Осыған дейін қалалық және облыстық деңгейде жарыстар өткізген болатынбыз. Жалпы әр жарыс – спортшы үшін үлкен тәжірибе, ұмытылмас эмоция. Бастысы көздеген мақсатқа қол жеткіздік. Бұйырса, келер жылы осы жарысты халықаралық деңгейге көтергіміз келеді. Оған толық мүмкіндік бар. Соған еңбектенеміз, - деді Маңғыстау облыстық «Ғаламдық тхэквондо» федерациясының президенті Сәттіғұл Абитов.

Бүгінгі таңда өңірде 600-ге жуық спортшы тхэквондо WTF спортымен шұғылданады. Ақтау қаласында және Мұнайлы ауданында арнайы жаттығу залдары бар.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.