Маңғыстау облыстық перинаталдық орталығына жаңа жабдықтар алынды

Маңғыстау облыстық перинаталдық орталығы көлік инкубаторы және үш фототерапия шамымен толықты. Жабдықтарды «Өмір сыйлайық» жобасы аясында «ЭксонМобил» компаниясының демеушілігімен «AYALA» қайырымдылық қоры алып берді, деп хабарлайды mangystaumedia.kz облыстық ҚКО-ға сілтеме жасап.

Бұл құралдар жаңа туған нәрестелердің өмірін сақтауға көмектеседі.

- Біздің облыста балалар өлімі мәселесі әлі де өзекті. Сондықтан біз балалар реанимациясын алдыңғы қатарлы медициналық жабдықтармен жабдықтау үшін көмек алғанымызға әрқашан қуанамыз. AYALA қорына біздің орталыққа 4 заманауи реанимациялық техника түріндегі сыйлығы үшін алғысымызды білдіреміз. Бұл аппараттарды біздің дәрігерлер жаңа туған нәрестелерді құтқару, сауықтыру және емдеу кезінде пайдаланатын болады. ЭксонМобил компаниясына жаңа туған нәрестелердің реанимация және қарқынды терапиясы бөлімшесіне қолдау көрсеткені үшін, балалардың денсаулығын қолдағаны үшін шынайы ризашылығымызды білдіреміз, - дейді Ақтаудағы перинаталдық орталық өкілдері.

Облыстық перинаталдық орталықта 230 төсек бар және ол бүкіл Маңғыстау облысы бойынша жүкті әйелдерге және жаңа туған нәрестелерге ІІІ деңгейдегі медициналық көмек көрсету бойынша жалғыз орталық болып табылады. Салмағы 500-ден 1500 грамға дейінгі шала туған балалардың 94%-дан астамы осы медициналық орталықта дүниеге келеді. Жүрек-қан тамырлары, тыныс алу жүйесі және ағзаның басқа да өмірлік маңызды жүйелері дамуының туа біткен ақаулары бар жаңа туған нәрестелер де жан-жақты медициналық қолдау алу және емдеу үшін жіберіледі.

- Денсаулық сақтау - біздің компанияның әлеуметтік жобалары үшін басым бағыттардың бірі. Реанимацияларды заманауи жабдықтармен қамтамасыз ету арқылы медициналық қызмет көрсету сапасын жақсарта отырып, біз еліміздің болашақ ұрпақтарының денсаулығы мен генетикалық әлеуетін сақтауға көмектесеміз. ЭксонМобил өңірдің медициналық орталықтарына көмек көрсетуде AYALA қайырымдылық қорымен және облыстық денсаулық сақтау басқармасымен ынтымақтастықты жалғастыруды жоспарлап отыр. Компанияның денсаулық сақтау саласына салған инвестициялары Маңғыстау облысы халқының денсаулығы мен әл-ауқатына айтарлықтай оң әсерін тигізеді деп үміттенеміз, - деді «ЭксонМобил» компаниясының жұртшылықпен байланыс жөніндегі кеңесшісі Ақмарал Сабирова.

AYALA қайырымдылық қоры 15 жылдан бері Қазақстандағы бала өлімі мен мүгедектігін азайту бойынша жұмыс істеп келеді. Осы уақыт ішінде қор 67 перинаталдық және ғылыми орталықтарға, сондай-ақ еліміздің балалар ауруханаларына 1100-ден астам реанимациялық жабдықтарды тапсырды. Бұл қатарға «Өмір сыйлайық» ауқымды республикалық жобасы бойынша заманауи реанимациялық жабдықтар кіреді.

- Біздің қор жұмысының басты мақсаты - қайырымдылық жасау. Демеушілердің қаражаты мен қазақстандықтардың қайырымдылық жарналары бір жолғы көмекке емес, жылдар бойы жұмыс істейтін жобаларға жұмсалады. Оның нәтижесі - біздің елден тыс жерлерде емес, Қазақстанның өз ішінде аман алып қалған жүздеген мың бала өмірі. Тек 2021 жылы ғана «Өмір сыйлайық» жобасы аясында қор Қазақстанның 12 перинаталдық орталығына 80 жаңа медициналық техника орнатты. Биыл жұмыс жалғасуда. Біздің міндетіміз - балалардың функционалды мүмкіндігін барынша көп сақтап қалу. Олар жайлы дамып, қарапайым балабақшаға, мектепке барып, болашақта мамандық алуы үшін. Біз "ЭксонМобил" компаниясымен осы көзқарасқта пікірлес болғанымызға қуаныштымыз. Ақтау қаласындағы облыстық перинаталдық орталығында орнатылған жабдықтар алдағы 5 жылда Маңғыстау облысында жүздеген нәрестенің өмірін сақтап қалуға көмектеседі, - деді «AYALA» ҚҚ президенті Айдан Сүлейменова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.