Таеквондо: Маңғыстаулық үш спортшы ҚР чемпионы атанды

Батыс Қазақстан облысында таеквондодан өткен ҚР чемпионатында Маңғыстау облысы жалпы есепте 2-орын алды, - деп хабарлайды mangystaumedia.kz сайты.

Жарыс 2-3 сәуір күндері өтті. Қызылорда, Павлодар, Ақтөбе, Ақтау және Шымкент пен Алматы қаласынан барлығы 200-ге жуық спортшы бақ сынады.

«4-9 жас аралығындағы жас таеквондошылар «Oral Open 2022» республикалық турниріне қатысса, 10-13 жастағы спортшылар ҚР чемпионатына қатысты. Маңғыстау құрамасы 32 таеквондошымен барды. Оның ішінде 19 спортшы фестивальге қатысқан. Ал 12 спортшы ел чемпионатында сынға түсті», - деді Маңғыстау облысы таеквондо федерациясының баспасөз қызметі.

Дүбірлі доданың қорытындысы бойынша облыс спортшылары жалпы есепте 2-орынға жайғасты. Яғни, 12 алтын, 5 күміс, 13 қола медальді қанжығаға байлады. Айта кетейік, 3 таеквондошы ҚР чемпионы атанды.

Жергілікті спортшыларды жарысқа бас бапкер, Маңғыстау облыстық ғаламдық таеквондо федерациясы президенті Сәттіғұл Абитов дайындаған.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.