«Тәуелсіздік ұрпақтары»: Түпқарағандық жас аниматор миллионер атанды

Ақшұқыр ауылында М. Әбдіхалықов атындағы мектеп-гимназиясының 9-сынып оқушысы Азиза Нұрланқызы миллионер атанды, - деп хабарлайды mangystaumedia.kz сайты.

Тәуелсіздіктің 30 жылдығы аясында ҚР Ақпарат және қоғамдық даму министрлігі «Тәуелсіздік ұрпақтары» грантын тағайындаған еді. Қазақстанның мәдени мұрасын танымал етуге, халықтық мәдени дәстүрлер мен өнерді ілгерілетуге бағытталған жобаларды іске асыруға арналған байқаудың «Мәдениет» саласындағы грантын түпқарағандық Азиза Нұрланқызы иеленіп, 3 миллион теңгені жеңіп алды.

Мультипликация, анимация жасаумен айналысатын Азиза еңбек нарығында 72 % сұранысқа ие мамандықты 7-сынып оқып жүргенде таңдаған. Қазір ол осы бағытта еңбектеніп, әртүрлі байқаудан бас бәйгені қанжығалап жүр.

«Суретті бала күнімнен саламын. Кейін телефонда түрлі графикалық бағдарламаларды қолданып, сурет салуды үйрендім. Сол сәттен бастап қызғушылығым оянып, ата-анама графикалық суреттерді салатын планшетте жұмыс жасағым келетінін жеткізгем. Ата-анам сөзімді жерге тастамай, шығармашылық қолдау білдірді. Мультипликатор–мультфильмдер жасайтын суретші дегенді білдіреді. Аниматор кейіпкерлердің сыртқы түрін анықтайды. Қимылын сызып, сюжеттік желімен жұмыс істейді. Оған түс пен қиялды қосыңыз. Барлығы қосылып сіз көретін мультфильм, анимациялық фильмді құрайды»,- дейді Азиза Нұрланқызы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.