Маңғыстауда 143 мектепке бейнебақылау камерасы орнатылды

Облыс бойынша жалпы 143 мектепке бейнебақылау камерасы орнатылды. Бұл туралы Қоғамдық коммуникация орталығында өткен брифингте Маңғыстау облысы әкімінің орынбасары Гүлмира Қалмұратова айтты, - деп хабарлайды mangystaumedia.kz.

Гүлмира Мұратқызының сөзінше, қазір қосымша бейнекамералар да сатып алынып жатыр. Талапқа сәйкес, мектептегі аналогты камераларды цифрлық камераларға ауыстыру жұмыстары жүріп жатыр.

«Бүгінде 96 мектептің камерасы полиция департаментінің жедел басқару орталығына қосылды. Оның ішінде Ақтау қаласындағы 28, Жаңаөзендегі 24, Маңғыстау ауданындағы 22, Мұнайлыдағы 16 және Түпқараған ауданының 6 мектебі бар. Аудан мектептерін бұл жүйеге кезең-кезеңмен қосу жұмыстары қарқынды жүргізілуде», - деді облыс әкімінің орынбасары.

Сондай-ақ, 143 мектепте дабыл түймесі орнатылған. Оның ішінде 62 мектептің түймелері жедел басқару орталығына, 81 мектептің түймелері күзет ұйымдарының диспетчерлік пультіне тіркелген.

«68 мектеп арнайы лицензиясы бар күзет ұйымдарымен қамтамасыз етілді. Олардың қызметі ҚР Ішкі істер министрлігі берген лицензиясы негізінде жүргізіледі. Келер жылдан бастап арнайы күзет ұйымдары барлық мектептерде енгізілетін болады. Бұдан бөлек облыстың 30 мектебінде турникет орнатылды», - дейді Гүлмира Қалмұратова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.